ეკომიგრანტ ოჯახს, რომლის განაცხადსაც განსახლების კომისია დააკმაყოფილებს, საცხოვრებელი სახლის შესარჩევად ვადა – 3 თვე მიეცემა. დღემდე ეკომიგრანტ ოჯახს საცხოვრებელი სახლის შესარჩევად 1 თვის ვადა ეძლეოდა.
საქართველოს ჯანდაცვის მინისტრის ახალი ბრძანებით:
„ეკომიგრანტ ოჯახს, რომლის განაცხადი დაკმაყოფილდა, საცხოვრებელი სახლის შერჩევისა და კომისიაზე წარდგენისათვის მიეცემა 3 თვის ვადა. თუ ეკომიგრანტი ოჯახი განსაზღვრულ ვადაში ვერ შეარჩევს სასურველ საცხოვრებელ სახლს, ამ შემთხვევაში კომისია, კრიტერიუმების შესაბამისად მინიჭებული ქულების გათვალისწინებით, რიგით შემდეგ ეკომიგრანტ ოჯახს შესთავაზებს საცხოვრებელი სახლის შერჩევას.“.
ცვლილება, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის ბრძანებით, „[ეკომიგრანტების] განსახლების პროცედურის, განსახლების კრიტერიუმების, ერთიანი ელექტრონული მონაცემთა ბაზის წარმოების წესის დამტკიცებისა და განსახლების საკითხების მარეგულირებელი კომისიის შესახებ“ მინისტრის ადრინდელ ბრძანებაში, 2022 წლის 22 ივლისიდან შევიდა.
მინისტრის ამავე ბრძანებით, ახალი რედაქციით დამტკიცდა ასევე „საცხოვრებელი სახლის მიღების თაობაზე განაცხადის ფორმა“ და „ეკომიგრანტი ოჯახების განსახლების კრიტერიუმები“.
სახელმწიფო ეკომიგრანტ ოჯახს, საცხოვრებელი სახლის შესაძენად, მაქსიმუმ 30 ათას ლარს უხდის ბიუჯეტიდან.
ამავე თემაზე:
https://batumelebi.netgazeti.ge/news/383499/
