„შავ ბაზარზე“ პრიმიტივის გავრცელებით, კრემლი ცდილობს, დასავლეთის შიშები გამოიყენოს. თუმცა რეალობა სრულიად სხვაგვარია: ჩვენი დამცველები მოტივირებული არიან და სწრაფად სწავლობენ; ყოველ ერთეულ შეიარაღებას იმდენი ოქროს ფასი აქვს, რამდენსაც იწონის; უზრუნველყოფილია სრული კონტროლი და პარტნიორებისთვის ინფორმაციის გამჭვირვალობა ყველა ეტაპზე.“
ასე პასუხობს უკრაინის პრეზიდენტის მრჩეველი, მიხაილო პოდოლიაკი ევროპოლის სპიკერის, იაპ ოპ გენ ოორტის განცხადებას, რომ ევროპოლს უკრაინიდან იარაღის კონტრაბანდის შესახებ ინფორმაცია აქვს.
იაპ ოპ გენ ოორტმა 21 ივლისს გერმანულ Der Spiegel-ს უთხრა, რომ დაფიქსირდა შავ ბაზარზე სამხედრო დანიშნულების პროდუქციითა და ცეცხლსასროლი იარაღით ვაჭრობის ფაქტები. ევროკავშირის გამომძიებლებმა „მძიმე შეიარაღებით ვაჭრობის ნიშნებიც“ აღმოაჩინეს, თუმცა არ დაუკონკრეტებია რა იარაღის გაყიდვაზეა საუბარი.
„არის რისკი, რომ იარაღი ორგანიზებული დამნაშავეების ან ტერორისტების ხელში მოხვდება,“ – აღნიშნა სპიკერმა.
ამ განცხადებას გუშინვე გამოეხმაურა უკრაინის ეროვნული უსაფრთხოებისა და თავდაცვის საბჭოს მდივანი ოლექსი დანილოვი და ევროპოლს მათ ხელთ არსებული ინფორმაციის უკრაინისთვის მიწოდება და მტკიცებულებების წარდგენა სთხოვა.
დანილოვმა ხაზი გაუსვა, რომ „იარაღის კონტრაბანდის“ შესახებ თემის გამოჩენა დროში ემთხვევა ფრონტზე დასავლური შეიარაღებით გამოწვეულ ცვლილებებს და უკრაინის დისკრედიტაციის მიზნით რუსეთის მასშტაბურ საინფორმაციო პროპაგანდას, რომლის მიზანიც უკრაინისთვის პარტნიორებისგან შეიარაღების მიწოდების შეჩერებაა.
