ნიკოლაევის გუბერნატორი ვიტალი კიმი, ოლქზე მორიგი საჰაერო თავდასხმის შემდეგ, ახალ ვიდეომიმართვას ავრცელებს და უკრაინელებს მოუწოდებს მოღალატეების გამოვლენაში მიიღონ მონაწილეობა.
„რუსები ტელეგრამ არხების დახმარებით ფულს უხდიან და ანონიმურობას ჰპირდებიან უკრაინელებს, რომლებიც დათანხმდებიან ცეცხლის კორექტირებაში დახმარებას, „ნავოდჩიკობას“. კაპიკებს უხდიან. ათას თუ ათას ხუთას გრივნას. ანონიმურობასაც ჰპირდებიან, მაგრამ არანაირი ანონიმურობა არ არსებობს. სისტემა მუშაობს და ჩვენ მათ მაინც ვიჭერთ,“ – ამბობს ვიტალი კიმი.
„ნავოდჩიკი“ – ცეცხლის მაკორექტირებელი, ადამიანი, რომელიც ჯარების სხვადასხვა სახეობას გასანადგურებლად აწვდის მოწინააღმდეგის პოზიციის კოორდინატებს და სამიზნის განსაზღვრაში ეხმარება.
ვიტალი კიმი აცხადებს, რომ ის 100 დოლარს გადაუხდის ყველას, ვინც ასეთ დაქირავებულ ცეცხლის მაკორექტირებლებს მიასწავლის.
„გამოვავლინოთ ის ადამიანები, რომლებიც მტერს ემსახურებიან… ეს ეხება ნიკოლაევის ოლქს. ეძებეთ ისინი მეგობრებო,“ – დასძენს გუბერნატორი.
ნიკოლაევში დღეს თითქმის მთელი დღის განმავლობაში საჰაერო განგაშის ხმა ისმის. ვიტალი კიმის ინფორმაციით, რუსებმა ნიკოლაევზე თავდასხმა გუშინაც განახორციელეს, თუმცა მას მსხვერპლი არ მოჰყოლია.
მთავარი ფოტო: ვიტალი კიმი/ფოტო: Суспільне
