ნეტგაზეთი • RU

რუსეთის არმიის წინსვლა და საბრძოლო ტემპი შენელდება – ბრიტანეთის დაზვერვა

დიდი ბრიტანეთის დაზვერვის უახლესი რელიზის მთავარი აქცენტი დონბასში მყოფი რუსეთის არმიის ნაწილების შემადგენლობა, ბრძოლისუნარიანობა და სტრატეგიაა. უწყების ინფორმაციით, რუსეთს დონბასის შეტევებში ნომინალურად ჰყავს ჩართული ექვსი ცალკეული არმია.

ეს ფორმირებები, ჯერ კიდევ ომის დაწყებამდე, დაახლოებით 150 000 სამხედროსგან შეიქმნა, თუმცა ბოლო კვირებში, ნებისმიერ სექტორში შეტევისას, რუსეთი ძირითადად ასეულის ზომის დაჯგუფებებით მოქმედებდა. 

„სამხედრო აგრესიის დაწყებიდან დღემდე, რუსეთი მთელი ძალით ცდილობს, შეინარჩუნოს ეფექტიანი საბრძოლო შეტევის ძალა. ეს პრობლემა, სავარაუდოდ, კიდევ უფრო მწვავდება,“ – წერს დიდი ბრიტანეთის დაზვერვა და ვარაუდობს, რომ პირადი შემადგენლობის სერიოზულ დეფიციტთან ერთად, რუსეთის სარდლობა სხვა დილემის წინაშეც დგას  – გადაისროლოს რეზერვები დონბასში თუ უკრაინის კონტრშეტევებისგან თავის დასაცავად ხერსონის სამხრეთ-აღმოსავლეთ სექტორში გააძლიეროს თავისი დანაყოფები.

„რუსეთის უახლესი და გამოცხადებული მიზანი დონეცკის ოლქის სრულად დაკავებაა. მიუხედავად იმისა, რომ რუსეთმა შეიძლება კვლავაც მიაღწიოს გარკვეულ ტერიტორიულ წარმატებებს, მისი არმიის საბრძოლო ტემპი და წინსვლის დინამიკა ძალიან შენელდება  გადაჯგუფებისა და გადაიარაღებისთვის აუცილებელი ოპერატიული პაუზების გარეშე,“ – მიუთითებს დაზვერვა.

გუშინდელ რელიზში გაერთიანებული სამეფოს თავდაცვა წერდა, როგორ იყენებს რუსეთი დონბასში კერძო სამხედრო დაჯგუფება „ვაგნერს“, რომელმაც დაზვერვის ინფორმაციით, ლუგანსკის ბრძოლებში გადამწყვეტი როლი შეასრულა.

მთავარი ფოტო: Anadolu Agency

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.