უკრაინის ყველაზე მდიდარი ადამიანი, მილიარდერი რინატ ახმეტოვი აცხადებს, რომ მედია ბიზნესიდან მიდის და უარს ამბობს საკუთარ მედიაჰოლდინგზე ქვეყნის სასარგებლოდ.
შესაბამისად, ახმეტოვის მედიაჰოლდინგში – „უკრაინის მედია ჯგუფში“ შემავალი ყველა მედიასაშუალება უარს იტყვის ლიცენზიებზე სახელმწიფოს სასარგებლოდ. საუბარია ტელეარხებზე, ვებგვერდებსა და ბეჭდურ მედიაზე, სადაც 4 ათასზე მეტი ადამიანია დასაქმებული.
ამის მიზეზი გახდა კანონი ოლიგარქიის შესახებ.
„ეს გადაწყვეტილება ნაკარნახევი იყო კანონით – „ეროვნული უსაფრთხოებისთვის საფრთხის აღკვეთის შესახებ, რომელიც დაკავშირებულია საზოგადოებრივ ცხოვრებაში მნიშვნელოვანი ეკონომიკური და პოლიტიკური წონის მქონე პირთა (ოლიგარქების) გადამეტებულ გავლენებთან.
როგორც უკრაინის ეკონომიკაში ყველაზე მსხვილ კერძო ინვესტორს, არაერთხელ მითქვამს, რომ არ ვიყავი, არ ვარ და არ ვიქნები ოლიგარქი.
მედიის აქტივების გაყიდვისთვის კანონით დაწესებული მოკლე ექვსთვიანი ვადა და რუსული სამხედრო აგრესია უკრაინის წინააღმდეგ არ აძლევს SCM-ს საშუალებას, გაყიდოს მედია ბიზნესი საბაზრო პირობებით“ – აცხადებს ახმეტოვი.
მისივე განცხადებით, ამ მედიაჰოლდინგში განხორციელებული ინვესტიციების მთლიანი მოცულობა 1,5 მილიარდ აშშ დოლარზე მეტია.
ახმეტოვის მედიასაშუალებების ლიცენზიები უკრაინის სახელმწიფოს საკუთრებაში გადაეცემა.
რინატ ახმეტოვი უკრაინის უმდიდრესი ადამიანია, კომპანია System Capital Management-ის დამფუძნებელი. სწორედ ამ კომპანიაში შედის მარიუპოლში მდებარე მეტალურგიული ქარხანა „აზოვსტალი“.
______________
ფოტოზე: რინატ ახმეტოვი. ფოტო: EPA/ROBERT GHEMENT
ამავე თემაზე:
