დაკარგულ სამხედროთა რაოდენობა უგზო-უკვლოდ დაკარგულთა საკითხების ომბუდსმენმა ოლეგ კოტენკომ დაასახელა. მისი თქმით, ამ რიცხვში შედიან სხვადასხვა სტრუქტურის, მათ შორის, ეროვნული გვარდიის, სასაზღვროსა და სპეცსამსახურების წარმომადგენლები.
„როდესაც ვლაპარაკობთ სამხედროებზე, ალბათ, გვესმის, რომ ვლაპარაკობთ შეიარაღებულ ძალებზე, ეროვნულ გვარდიაზე, მესაზღვრეებზე, დაზვერვაზე. ეს სხვადასხვა ინსტიტუტია. იმ მონაცემებში, რომლებსაც უკრაინის შეიარაღებული ძალები გვაძლევს, ყველა მათგანი არ იგულისხმება.
უკრაინის შეიარაღებული ძალები მხოლოდ 2 000 დაკარგულ სამხედროზე საუბრობს. ჩვენს ქოლცენტრში კი 7 200 ადამიანზე შემოვიდა ინფორმაცია. მაგალითად, პოლკი „აზოვი“ ნაციონალური გვარდიაა (ექვემდებარება შინაგან საქმეთა სამინისტროს) და მათ შორისაც არიან დაკარგულები. რაც „აზოვსტალიდან“ გამოვიდნენ, ზოგიერთი მათგანი ახლობლებს ვერ დაუკავშირდა,“ – ამბობს ოლეგ კოტენტკო.
ის დასძენს, რომ დაკარგული სამხედროების უმრავლესობა ტყვეობაშია და მაგალითად, 36-ე ბრიგადის პირველი ბატალიონი მოჰყავს:
„ჩვენ ვიცით, რომ ისინი რუსეთში გადაიყვანეს. პირველ რიგში, უნდა გაირკვეს, რამდენი ადამიანია იქ. თუ ასზე მეტია, მაშინ პრაქტიკულად, მთელი ბატალიონი ტყვეობაშია. მათთან კავშირი არ არის, ამიტომაც ისინი უგზო-უკვლოდ დაკარგულებად მიიჩნევიან. ადრე თუ გვიან ისინი გაცვლის სიაში მოხვდებიან და დაბრუნდებიან. ეს ის შემთხვევაა, როდესაც ჩვენ ვიცით, რომ დაკარგულები ცოცხლები არიან.“
როგორც უკრაინული მედია წერს, ქვეყნის ხელისუფლება ომში უკრაინის დანაკარგებს არ ასაჯაროებს. აქამდე არსებული ცნობებით, რუსეთის ტყვეობაში მარიუპოლის 2 500-მდე დამცველი იმყოფება. 144 სამხედრო ტყვე უკრაინამ ყველაზე მსხვილი გაცვლის ფარგლებში 29 ივნისს დაიბრუნა, მათ შორის, 95 „აზოვსტალიდან“ იყო.
7 ივნისს რუსეთის თავდაცვის მინისტრმა სერგეი შოიგუმ განაცხადა, რომ რუსეთს 6 489 უკრაინელი სამხედრო ტყვე ჰყავს.
მთავარი ფოტო: უკრაინის გენშტაბის ფოტო
