აჭარის უმაღლესი საბჭოს ბიუჯეტი 2017 წელს, სავარაუდოდ, მთლიანობაში 17 200 ლარით შემცირდება, თუმცა ეს არ აისახება დეპუტატების ხელფასებზე. ბიუჯეტის პროექტის მიხედვით, უმაღლესი საბჭოს თანამდებობრივი სარგო ჯამში 5400 ლარით გაიზრდება. უმაღლესი საბჭოს საფინანსო-საბიუჯეტო და ეკონომიკურ საკითხთა კომისია უკვე შეუდგა მომავალი წლის ბიუჯეტის პროექტის განხილვას.
„ჩვენ ვამცირებთ ბიუჯეტს. ძირითადად შემცირდება წარმომადგენლობითი ხარჯები. ჩვენ მალე ამ პროექტს სხვა კომისიებს მივაწოდებთ ფართო განხილვისთვის“ – უთხრა „ბათუმელებს“ ანზორ თხილაიშვილმა, უმაღლესი საბჭოს საფინანსო-საბიუჯეტო და ეკონომიკურ საკითხთა კომისიის თავმჯდომარემ.
„ეს მხოლოდ სიმბოლური კლებაა. უმაღლესი საბჭო ისევ დარჩება ორგანიზაციად, რომელიც მაქსიმალურ საბიუჯეტო სარგებელს იღებს. არაფერი იცვლება“ – ამბობს ამავე კომისიის წევრი ფრაქცია „ერთიანი ნაციონალური მოძრაობიდან“ ეკა თარგამაძე.
უმაღლესი საბჭოს მომავალი წლის ბიუჯეტის პროექტის მიხედვით, შემცირდება აპარატის მუშაკების თანამდებობრივი სარგო 7260 ლარით, დანამატი – 4910 ლარით. ასევე შემცირდება ფრაქციის აპარატის ხარჯი – ჯამში 11 ათასი ლარით, ხოლო საწვავის შეძენა – 17 080 ლარით. ბიუჯეტის პროექტის მიხედვით, უმაღლეს საბჭოში მომავალ წელსაც 125 ადამიანი იმუშავებს. პროექტის მიხედვით, სამომავლოდ, უმაღლეს საბჭოში ოფისის ხარჯები 7240 ლარით გაიზრდება.
წელს უმაღლესი საბჭოს ბიუჯეტი 4 მილიონ 957 ათას ლარს შეადგენს. პროექტის მიხედვით, 2017 წელს ეს უწყება 4 მილიონ 939 ათასით დაფინანსდება.
