უკრაინაში მებრძოლი ქართველი ჯარისკაცი ვანო ნადირაძე საქართველოს პრემიერ-მინისტრის, ირაკლი ღარიბაშვილის განცხადებას ეხმიანება, რომელმაც უკრაინაში მებრძოლ ქართველებს „დაქირავებული მოხალისეები“ უწოდა.
„ჩვენ ვართ ბაევიკები? ჯიბეგამოფხეკილები… აი, ჯიბეში რამდენი მაქვს, ჩვენს ფულზე 2 ლარიც არ მაქვს, ღარიბი ბიჭები ვართ, მაგრამ გულიანები, პატრიოტები, ქართველები, მორალურად მდიდრები ვართ შენზეც, შენს შეფზე, ივანიშვილზეც, ამ დროშას, სადაც არ უნდა ვიყო, ღირსეულად ვატარებ.
შენს ბჟუტურს გავატარებდით, მაგრამ აქ იმდენი ვაჟკაცი ბიჭი დაგვეღუპა, იმდენი წესიერი ბიჭი დაგვეჭრა, რომ იმათ შეურაცხყოფას უკვე ნამდვილად არ გაპატიებთ. ეს იმას არ ნიშნავს, რომ ფიზიკური განადგურებით გემუქრები, შენ ისედაც განადგურებული კაცი ხარ, უბრალოდ ერთ ფრაზას გეტყვი, ცნობილი ფილმიდან, „მონანიებიდან“, ალბათ ივანიშვილიც ხშირად გეუბნება – „დოქსოპულო, დედა გყავს?“ – ამბობს ვანო ნადირაძე.
რამდენი ქართველი მებრძოლია უკრაინაში, დაზუსტებული რიცხვი არ არსებობს, თუმცა სავარაუდოდ ომში ასობით საქართველოს მოქალაქე მონაწილეობს.
ქართველები იბრძვიან ქართულ ლეგიონში, აზოვის ბატალიონში, უკრაინის უცხოურ ლეგიონში, ჩეჩნურ ბატალიონებსა და სხვადასხვა შეიარაღებულ ჯგუფში.
