ბათუმში, შინდისის გმირების სახელობის სკვერი ორ კვირაზე მეტია ჩაბნელებულია. სკვერიდან გატანილია სკამების ნაწილიც.
სკვერის მოვლა-პატრონობა მუნიციპალური სერვისების სააგენტოს ევალება. სააგენტოში გვითხრეს, რომ სკამები, რომელებიც პარკიდან წაიღეს, დაზიანებული იყო. ამჟამად მათი რეაბილიტაცია მიმდინარეობს და მოგვიანებით უკან, პარკში დააბრუნებენ.
„რაც შეეხება გარეგანათებას, გამოცხადებულია ტენდერი სანათი ლამპიონების შესაძენად და დაიწყება სამუშაოები“, – უთხრეს „ბათუმელებს“ მუნიციპალური სერვისების სააგენტოს პრესსამსახურში.
კითხვაზე, თუ როდის დაიწყება უშუალოდ სამუშაოების განხორციელება, პრესსამსახურში გვიპასუხეს, რომ სატენდერო პროცედურების დასრულების შემდეგ.
სახელმწიფო შესყიდვების სააგენტოს ვებგვერდზე განთავსებული ინფორმაციის თანახმად, მუნიციპალური სერვისების სააგენტომ სხვადასხვა სახის სადენის, მავთულის და მათთან დაკავშირებული მასალების შესაძენად ხელშეკრულება 4 მაისს დადო, 40 490 ლარზე. ტენდერში გამარჯვებულმა კომპანია შპს „ოთობმს“-მა სააგენტოს მასალები 30 ივნისამდე უნდა მიაწოდოს.
