თბილისის წიგნის საერთაშორისო ფესტივალზე პროექტს „მსახიობები ლიტერატურისთვის“ კომპანია სილქნეტი 27-28-29 მაისს წარადგენს. საგამოფენო ცენტრ ექსპო ჯორჯიას მე-11 პავილიონში, საგანგებოდ მოწყობილი სცენა ყველა თაობის მსახიობს გააერთიანებს. ცნობილ ხელოვანებთან ერთად პროექტში მონაწილეობას მოზარდები მიიღებენ.
სამი დღის განმავლობაში მსახიობები ფესტივალის სტუმრებს გააცნობენ ქართველ და უცხოელ ავტორებს, ფესტივალზე წარდგენილ ახალ გამოცემებს, გაიმართება დისკუსია აქტუალურ თემებზე.
ლიტერატურის პოპულარიზაციის მიზნით, პროექტის გარშემო, ოცდაათზე მეტი ხელოვანი მსახიობმა ნინო კასრაძემ გააერთიანა.
„მოხარულები ვართ, რომ თბილისის წიგნის საერთაშორისო ფესტივალზე სილქნეტი უკვე მესამედ წარადგენს პროექტს „მსახიობები ლიტერატურისთვის“. ლიტერატურა საგანგებოდ არის შერჩეული. ვიმედოვნებთ, რომ ხელოვანების მიერ წაკითხული, გათამაშებული და საინტერესოდ გადმოცემული ესა თუ ის ნაწარმოები, განსაკუთრებულ გარემოს შექმნის და ფესტივალის სტუმრებს საშუალებას მისცემს ახლოს გაეცნონ ავტორებს და ადგილზე შეიძინონ წარმოდგენილი ლიტერატურა.“ – განაცხადეს სილქნეტში.
პროექტ „მსახიობები ლიტერატურისთვის“ ღონისძიებები გაიმართება 27-28-29 მაისს საგამოფენო ცენტრ ექსპო ჯორჯიას მე-11 პავილონში, 12:00სთ -დან 19:00 საათამდე.
დასწრება თავისუფალია.
