ბელარუსის ქმედებები უკრაინელ სამხედროებს აიძულებს საზღვართან დარჩნენ – ბრიტანული დაზვერვა

გაერთიანებული სამეფოს დაზვერვის სამსახურის ბოლო მონაცემებში საუბარია ბელარუსის მიერ უკრაინისთვის შესაძლო დაბრკოლებების შექმნაზე. როგორც დაზვერვა წერს, ოფიციალურმა მინსკმა თვის დასაწყისში დაანონსებულ სამხედრო წვრთნებთან დაკავშირებით გამოაცხადა, რომ უკრაინის საზღვართან სპეციალური ოპერაციების ძალებს განათავსებს, ისევე როგორც ქვეყნის დასავლეთით მდებარე საწვრთნელ პოლიგონებზე განათავსებს საჰაერო თავდაცვის, საარტილერიო და სარაკეტო ქვედანაყოფებს.

როგორც ბრიტანული დაზვერვა წერს, ეს ნაბიჯი უკრაინას აიძულებს დატოვოს სამხედროები ბელარუსის საზღვართან, შესაბამისად, აბრკოლებს დონბასში მიმდინარე მოქმედებების მხარდასაჭერად მათ გადასროლას.

მიუხედავად მანამდე არსებული სპეკულაციებისა, ბრიტანული დაზვერვის ინფორმაციით, ბელარუსის სამხედრო ძალები ამ დრომდე არ ყოფილან კონფლიქტში პირდაპირ ჩართული. მიუხედავად ამისა, ბელარუსის ტერიტორიას რუსული სამხედროები იყენებდნენ კიევსა და ჩერნიგოვში წარმატების მისაღწევად, როგორც განლაგების პუნქტს. რუსეთმა ასევე განახორციელა საჰაერო გაფრენები და სარაკეტო თავდასხმები უკრაინაზე ბელარუსის ტერიტორიიდან.

გაერთიანებული სამეფოს დაზვერვის სამსახურის შეფასებით, ბელარუსის პრეზიდენტი ალექსანდრე ლუკაშენკო სავარაუდოდ ასე ცდილობს დააბალანსოს რუსეთის უკრაინაზე თავდასხმის მხარდაჭერა და პირდაპირი სამხედრო მონაწილეობისგან თავშეკავების სტრატეგია, რათა თავიდან აირიდოს დასავლური სანქციების რისკი, უკრაინის საპასუხო მოქმედებები და შესაძლო უკმაყოფილება ბელარუსის სამხედროებს შორის.

___

მთავარი ფოტო: ბელარუსის პრეზიდენტი ალექსანდრე ლუკაშენკო მაღალი რანგის სამხედროებთან ერთად ესწრება „ზაპად 2017“-ს – რუსეთისა და ბელარუსის საერთო სამხედრო წვრთნებს. EPA-EFE/TATIANA ZENKOVICH