ნეტგაზეთი • RU

უკრაინაში კიბოთი დაავადებულთა მკურნალობა შეჩერებულია – ზელენსკი

უკრაინაში რუსეთის სრულმასშტაბიანი შეჭრისა და ომის გამო კიბოთი დაავადებულთა მკურნალობა მთლიანად შეჩერებულია. ამის შესახებ უკრაინის პრეზიდენტმა ვოლოდიმირ ზელენსკიმ ხუთშაბათს სპეციალური მიმართვისას განაცხადა.

ზელენსკის თქმით, რუსეთის სამხედრო აგრესიის გამო უკრაინაში ჯანდაცვის სისტემა სერიოზული პრობლემების წინაშე აღმოჩნდა. მისივე თქმით, დღემდე რუსეთის ჯარებმა უკრაინაში გაანადგურეს ან დააზიანეს 400-მდე სამედიცინო დაწესებულება: საავადმყოფოები, სამშობიაროები, კლინიკები.

„ჩვენს ქვეყანაში ამჟამად არ არსებობს კიბოთი დაავადებული პაციენტების მკურნალობა.  გარდა ამისა, უკრაინას პრობლემები აქვს ინსულინზე წვდომასთან დაკავშირებით, არის ანტიბიოტიკების ნაკლებობა …

უკრაინის დროებით ოკუპირებულ ტერიტორიებზე აღმოსავლეთსა და სამხრეთში კატასტროფული ვითარებაა სამედიცინო სერვისებსა და მედიკამენტებზე ხელმისაწვდომობის მხრივ. უმარტივესი წამლების ნაკლებობაც კი არსებობს,“ – თქვა ზელენსკიმ.

„რუსეთმა ისეთი პრობლემები მოუტანა უკრაინასა და ევროპას, რასაც რამდენიმე თვის წინ ვერ წარმოვიდგენდით … ეს არის ქირურგიული ოპერაციის ჩატარების შეუძლებლობა, ეს არის ანტიბიოტიკების უკმარისობაც!“ – დასძინა უკრაინის პრეზიდენტმა.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან