რუსეთის სახელმწიფო სათათბიროს [დუმა] სხდომაზე სპიკერმა, სერგეი ვოლოდინმა განაცხადა, რომ „ყველას დასჯიან“, ვინც მათ „ბევრი რამე წაართვა“. სპიკერის თქმით, ქვეყანა „ახლა იბრუნებს ტერიტორიებს“.
სერგეი ვოლოდინმა თავის კოლეგებს ასე მიმართა: „ჩვენ რესურსები არ დაგვიკარგია. ისინი გაყინეს. ჩვენ ისინი უნდა დავიბრუნოთ – ეს ამოცანა უნდა დავისახოთ. როდესაც მოვიფიქრებთ, რა წაგვართვეს. კი, ჩვენ ძალიან ბევრი რამ წაგვართვეს.
ქვეყანა ახლა იბრუნებს ამ აქტივებსაც და ტერიტორიებსაც. ფულსაც დავიბრუნებთ, პროცენტებსაც გადაგვიხდიან. ამის უნდა გვჯეროდეს.
ახლა იმაზე, თუ ვინაა დამნაშავე? და ვინაა იმ პრობლემებში დამნაშავე, რომლის შედეგებსაც ჩვენ დღემდე ვასწორებთ.
მოდით, მაშინ ამით დავიწყოთ – ეს არ არის საჭირო. ჩვენც ვართ ასევე პასუხისმგებლები, ჩვენ ყოველ თვეში, ყოველ წელს, ვიბარებდით ანგარიშებს, რაღაცას ვეთანხმებოდით, რაღაცას არ ვეთანხმებოდით. მოდი, ახლა გავერთიანდეთ, აქტივებიც დავიბრუნოთ და ყველა დავსაჯოთ, ვინც ასე მოგვექცა“.
___
რუსეთი უკრაინაში 24 თებერვალს შეიჭრა. ომიდან 62 დღის გასვლის შემდეგ უკრაინის რამდენიმე ქალაქი სარაკეტო თავდასხმის შედეგად მიწასთან არის გასწორებული. დაღუპულია ათასობით სამოქალაქო პირი. რამდენიმე მილიონი უკრაინელი კი დევნილად იქცა.
