„მიღებული ინფორმაციით, ქალაქი კრემენაია დაეცა, დაძაბული ბრძოლები გრძელდება იზიუმის სამხრეთით, რუსეთის ძალები ცდილობენ, ჩრდილოეთიდან და აღმოსავლეთიდან წაიწიონ წინ სლოვიანსკისა და კრამატორსკის მიმართულებით“, – ამის შესახებ წერს დიდი ბრიტანეთის დაზვერვა ტვიტერზე.
უწყება უკრაინაში მიმდინარე მოვლენების 26 აპრილის განახლებას აქვეყნებს.
„რუსული ძალები, სავარაუდოდ, ცდილობენ ალყაში მოაქციონ უკრაინის მყარად გამაგრებული პოზიციები ქვეყნის აღმოსავლეთში“.
ბრიტანეთის დაზვერვა აღნიშნავს, რომ უკრაინის შეიარაღებული ძალები ემზადებიან ზაპოროჟიეს დასაცავად, რადგან არსებობს სამხრეთიდან რუსეთის არმიის თავდასხმის ალბათობა.
გუშინ დიდი ბრიტანეთის დაზვერვა წერდა, რომ „რუსეთს ჯერ კიდევ არ მიუღწევია მნიშვნელოვანი გარღვევისთვის“.
