ფინეთის ევროპის საქმეთა მინისტრმა, ტუტი ტუპურაინენმა ბრიტანულ Sky News-თან განაცხადა, რომ ფინეთი, დიდი ალბათობით, უახლოეს მომავალში გახდება ნატოს წევრი.
მისი თქმით, საბოლოო გადაწყვეტილება ჯერ არ არის მიღებული და საკითხი პარლამენტმა უნდა განიხილოს, თუმცა ფინეთის მოსახლეობის უმრავლესობა ნატოში გაწევრიანების მომხრეა.
მინისტრმა აღნიშნა, რომ რუსეთის თავდასხმამ უკრაინაზე ბევრს აუხილა თვალი.
ტუტი ტუპურაინენმა ასევე კომენტარი გააკეთა რუსეთის ოფიციალური პირების განცხადებაზე იმის შესახებ, რომ ფინეთის და შვედეთის ნატოში შესვლას მოჰყვება უარყოფითი შედეგები ჩრდილოეთ ევროპისთვის.
„რაც არ უნდა თქვას რუსეთმა, ჩვენ, რა თქმა უნდა, ვისმენთ ამას, მაგრამ გადაწყვეტილებებს ვიღებთ ჩვენი ინტერესებიდან გამომდინარე“ – თქვა მან.
ფინეთის პრემიერ-მინისტრმა, სანა მარინმა შვედეთის პრემიერთან შეხვედრის შემდეგ განაცხადა, რომ გადაწყვეტილებას ფინეთი ნატოში შესვლის შესახებ უახლოეს კვირებში მიიღებს.
ფინეთმა და შვედეთმა ნატოში გაწევრიანების სურვილის შესახებ განცხადება უკრაინაში საომარი ვითარების დაწყების შემდეგ გააკეთეს.
„როიტერსის“ ცნობით, ფინეთის კერძო მაუწყებლის, MTV-ის ბოლო გამოკითხვამ აჩვენა, რომ ფინეთში გამოკითხულთა 68% მხარს უჭერს გაწევრიანებას, წინააღმდეგი კი მხოლოდ 12% იყო.
რუსეთი ომის დაწყებამდე დასავლეთს სთხოვდა, რომ ნატო აღარ უნდა გაფართოებულიყო.
____________
ფოტოზე: ფინეთის პრემიერ-მინისტრი სანა მარინი და ევროპის საქმეთა მინისტრი ტუტი ტუპურაინენი.
