რუსეთის ფედერაციის საგამოძიებო კომიტეტი უკრაინაში მებრძოლი ქართული ლეგიონის მეთაურს, მამუკა მამულაშვილს, ომის დანაშაულებების ჩადენის ბრალდებას უყენებს.
კომიტეტის ვებგვერდზე გამოქვეყნებული ინფორმაციით, უწყების თავმჯდომარემ, ალექსანდრ ბასტრიკინმა უკვე დაავალა საგამოძიებო განყოფილებას, გამოიძიონ რუსი სამხედროების წინააღმდეგ ჩადენილი ქმედებები და სისხლის სამართლებრივი პასუხისმგებლობა დააკისრონ მამუკა მამულაშვილს. მას რუსეთის ფედერაცია ომის წარმოების წესების დარღვევაში და რუსული გვარდიისა და შეიარაღებული ძალების წარმომადგენლების მიმართ სასტიკ მოპყრობაში ადანაშაულებს.
„უკრაინის შეიარაღებულ ძალებში მყოფი ქართული ლეგიონის წევრები უკანონო ქმედებებს სჩადიან რუსი სამხედროების წინააღმდეგ. გარდა ამისა, მამულაშვილის მხრიდან გაკეთდა არაერთი საჯარო განცხადება, რომ ის მომავალშიც აპირებს განაგრძოს რუსეთის სამხედროების, ნაციონალური გვარდიის წევრებისა და ჩრდილოეთ კავკასიის ოპერატიული დანაყოფის წევრების წამება და მკვლელობა. ეს ქმედებები პირდაპირ ეწინააღმდეგება ჟენევის კონვენციის 1949 წლის 12 აგვისტო დებულებებს სამხედრო ტყვეთა მოპყრობის შესახებ“, – ნათქვამია კომიტეტის მიერ გავრცელებულ ინფორმაციაში.
ალექსანდრ ბასტრიკინმა დაავალა გამომძიებლებს, დაადგინონ დანაშაულების ჩადენის გარემოებები და მათში მონაწილე ყველა პირს დააკისრონ სისხლის სამართლებრივი პასუხისმგებლობა.
„ქართული ლეგიონი“ უკრაინაში მიმდინარე საომარ მოქმედებებში 2014 წლიდანაა ჩართული.
4 აპრილს მამუკა მამულაშვილმა კომენტარი მისცა ყოფილი რუსი ოლიგარქის, მიხაილ ხოდორკოვსკის იუთუბარხს – Ходорковский LIVE, სადაც მან ანაცხადა: „მე ახლა „ქართულ ლეგიონზე“ გეუბნებით, ჩვენ რუს ჯარისკაცებს, ტყვედ არც ერთ შემთვევაში არ ავიყვანთ, არც კადიროველებს. არცერთი ადამიანი ტყვედ არ ჩავარდება“.
___
ამავე თემაზე:
უკრაინაში მებრძოლი: საქართველოს ოკუპაციას რამდენიმე საათი დასჭირდება, თუ აქ დავმარცხდით
