ნეტგაზეთი • RU

უკრაინელი ქალი ჰყვება, რომ ის ბათუმში გააუპატიურეს, მაგრამ დღემდე დაზარალებულად არ უცნიათ

უკრაინის მოქალაქე, 47 წლის ქალი ამბობს, რომ 2022 წლის იანვარში, ძველით ახალი წლის ღამეს, ის გააუპატიურეს. ქალი გასული წლიდან ბათუმში ცხოვრობს და მუშაობს. ამის შესახებ დღეს თბილისში პრესკონფერენცია გამართა არასამთავრობო ორგანიზაცია „საფარმა“, რომელიც ქალთა უფლებებზე მუშაობს. ქალი ამბობს, რომ ორგანიზაციას მას შემდეგ მიმართა დასახმარებლად, რაც დარწმუნდა, რომ პოლიცია საქმეს სათანადოდ არ იძიებდა.

უკრაინის მოქალაქე ქალი „ბათუმელებს“ უყვება, რომ მეზობელმა ოჯახმა ბათუმში ის ძველით ახალი წლის აღსანიშნად, საღამოს ვახშმად მიიწვია.

„ეს იყო გიორგი ხ-ს ოჯახში, სახლში იყო დედამისიც, ლალი მ. რომელიც ძველით ახალი წლის ღამეს ამზადებდა კერძებს და შლიდა სუფრას. მუსიკა ჰქონდათ ჩართული, ღვინოც იყო სუფრასთან, არაფერი ეჭვს არ იწვევდა. მერე მოვიდა ახალგაზრდა კაცი სტუმრად, რომელიც გამეცნო როგორც  გიორგი ხ.-ს მეგობარი, ლაშა ჩ. მას მე მანამდე არ ვიცნობდი.

მალე გიორგის დედა სახლიდან უხმოდ გავიდა და მარტო დაგვტოვა. ძალიან გამიკვირდა. არ უთქვამს, სად, რატომ და რისთვის მიდიოდა გვიან ღამით. ამან დამაეჭვა, მაგრამ ვიფიქრე ალბათ დაბრუნდება-მეთქი. დავრჩით სამნი, მე და ეს ორი კაცი: გიორგი და ლაშა“, – გვიყვება უკრაინის მოქალაქე.

მისი მონათხრობის მიხედვით, ამის შემდეგ ლაშა ჩ. სახლიდან გავიდა და დაბრუნდა პლასტმასის ბოთლით. ის ირწმუნებოდა, რომ ეს გაცილებით უკეთესი და გემრიელი ღვინო იყო, ვიდრე აქამდე სვამდნენ.

ქალი ჰყვება, რომ ამის შემდეგ ლაშა ჩ.-მ თავის მეგობარ გიორგის ხ.-ს საბანკო ბარათი გაუწოდა და რაღაც უთხრა ქართულად. ქალმა ვერ გაიგო რა თქვა მან, რადგან არ იცის ქართული.

ქალის მონათხრობის მიხედვით, მასპინძელმა უსიტყვოდ აიღო ბანკის ბარათი და ასევე უსიტყვოდ დატოვა საკუთარი ბინა.

„ამ ყველაფერმა ცხადია ძალიან გამაკვირვა. ახალი წლის ასეთი აღნიშვნა საეჭვო და არაბუნებრივ გარემოებად იქცა. თუმცა ვფიქრობდი, რომ რამდენიმე წუთში გიორგი ხ. უკან დაბრუნდებოდა.

მალევე ლაშა ჩ.-მ თავისი მოტანილი ღვინო დამისხა, მოვსვი ორი ყლუპი და 2-3 წუთში გონება დავკარგე. 47 წლის ვარ და მსგავსი რამ არასდროს გადამიტანია.

უცებ გაქრა გამოსახულება, ხმები, გავითიშე და როცა აზრზე მოვედი, ვერ ვხვდებოდი რამდენი დრო გავიდა, სად ვიყავი, რომელ ქვეყანაში, ვისთან და რატომ. მთლიანად მქონდა დროის შეგრძნება დაკარგული.

გამაღვიძა საშინელმა ტკივილმა და თმის ქაჩვამ, როცა ლაშა ჩ. ჩემზე სადისტურად ძალადობდა. მაუპატიურებდა და თმას მგლეჯდა. ვერ ვიშორებდი.

ვერ მოვეგე გონს რა მიქნეს, რა გამიკეთეს, იქნებ თირკმელი ამომაჭრეს, ან იქნებ არამხოლოდ ამ ერთმა, რამდენიმემ იძალადა ჩემზე-მეთქი, ამასაც ვფიქრობდი.

აღმოჩნდა, რომ მას შემდეგ, რაც გონება დავკარგე, ლაშა ჩ.-მ წამიყვანა სხვაგან – არ ვიცი როგორ და რანაირად, მაგრამ მერე გავარკვიე, რომ სადაც გონზე მოვედი, ეს იყო კერძო სასტუმრო, 100-150 მეტრში იყო იმ სახლიდან, სადაც ახალი წლის აღნიშვნა დავიწყეთ.

ეს კაცი ჩემზე 12 წლით უმცროსია, მე 47 წლის ვარ. ამბობდა, რომ 35 წლის არის, როცა ახალი წლის აღნიშვნა დავიწყეთ.

ამ ადამიანმა იძალადა ჩემზე, გამთიშა, გამაუპატიურა, ღვინით მომწამლა და ყველაფერი ჩემი ნების საწინააღმდეგოდ გააკეთა“, – გვიყვება ქალი.

არასამთავრობო ორგანიზაცია „საფარის“ ინფორმაციით, ქალი მათ ერთი თვის წინ დაუკავშირდა და დახმარება ითხოვა. „საფარმა“ მალევე მიმართა პროკურატურას ქალის დაზარალებულად ცნობის მოთხოვნით, თუმცა ორგანიზაციას უწყებიდან პასუხი ამ დრომდე არ მიუღია.

საფარი ასევე წერს, რომ მას შემდეგ, რაც ქალმა პოლიციას მიმართა, ბათუმის მესამე განყოფილებაში, თავდაპირველად ის თარჯიმანთან ერთად გამოკითხეს, თუმცა მეორე გამოკითხვას თარჯიმანი არ ესწრებოდა.

როგორც ქალი ჰყვება, პოლიციის განყოფილების უფროსმა ის დაარწმუნა, რომ გამოძიების შეუფერხებლად  წარმართვის მიზნით ხელი უნდა მოეწერა ქართულად შედგენილი გამოკითხვის ოქმისთვის. შესაბამისად, მან არ იცის, რაზე მოაწერინეს ხელი. „საფარი“ არც იმას გამორიცხავს, რომ დამნაშავე სავარაუდოდ ტერიტორიულად ქალთან ახლოს ცხოვრობს, მის მიმართ კი ამ დრომდე შემაკავებელი ორდერიც კი არ გამოცემულა.

როგორც პრესკონფერენციაზე „საფარის“ აღმასრულებელმა დირექტორმა, ბაია პატარაიამ ისაუბრა, სქესობრივი ძალადობის მსხვერპლი უცხოელი ქალების მიმართ კიდევ უფრო სტერეოტიპულია დამოკიდებულება საქართველოში:

„ჩვენი მართლმსაჯულების სისტემას არ სჯერა, რომ უცხოელი ქალიც შეიძლება იყოს გაუპატიურებული და მიაჩნია, რომ ყველა ეს შემთხვევა არის თანხმობით განხორციელებული. ქართველი ქალების შემთხვევაში გვაქვს მაგალითები, როცა ქალის დაზარალებულად ცნობა არ ხდება, მიუხედავად იმისა, რომ საკმარისზე მეტი მტკიცებულებები დევს საქმეში“ – ამბობს ბაია პატარაია.

მისივე თქმით უკრაინის მოქალაქე ქალი ხშირად ხედავს ბათუმში მასზე მოძალადეს, რომლის ამოცნობაც შეუძლია, მეტიც, მოძლადე ქალის სახლთან ახლოს ცხოვრობს და შემაკავებელი ან დამცავი ორდერიც კი არ არსებობს საქმეში.

„საფარი“ ითხოვს:

  • საქმეზე გამოძიება აწარმოოს ბათუმის პოლიციის სამმართველომ, რადგან ორგანიზაცია არ ენდობა იმ განყოფილების პოლიციელებს, რომლებმაც უკრაინის მოქალაქე ქალი თარჯიმნის გარეშე გამოკითხეს
  • დაუყოვნებლივ მიენიჭოს დაზარალებულის სტატუსი ქალს
  • დაიწყოს სისხლის სამართლებრივი დევნა სავარაუდო დამნაშავის მიმართ
ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com