აშშ-ის პრეზიდენტის მრჩევლის თქმით, რუსეთმა მიზნები შეცვალა უკრაინაში და ომის ახალი ეტაპისთვის ემზადება. ჯეიკ სალივანის თქმით, რუსეთი შეტევას უკრაინის აღმოსავლეთსა და სამხრეთში გააძლიერებს.
„რუსეთი გადაანაწილებს თავის ძალებს, რათა შეტევა გააძლიეროს უკრაინის აღმოსავლეთსა და სამხრეთის ზოგ რაიონში“, – განაცხადა აშშ-ის პრეზიდენტის, ჯო ბაიდენის მრჩეველმა, ჯეიკ სალივანმა 4 აპრილს ვაშინგტონში გამართულ ბრიფინგზე.
სალივანის თქმით, რუსეთი, სავარაუდოდ, უკრაინის აღმოსავლეთით და სამხრეთით ათიათასობით ჯარისკაცის გადაყვანას და დამატებითი ბატალიონის, ტაქტიკური ჯგუფების განლაგებას გეგმავს დონეცკისა და ლუგანსკის რეგიონებში.
უკრაინაში რუსეთის მიერ 24 თებერვალს დაწყებულ ომში დაახლოებით 200 ათასი რუსი ჯარისკაცია ჩართული.
ამავე განცხადების მიხედვით, რუსეთი ძალების მობილიზებას შეეცდება დონბასის უფრო დიდი ტერიტორიების მისატაცებლად, რომ შენიღბოს მიმდინარე ომში საკუთარი სამხედრო წარუმატებლობები.
გარდა ამისა, სალივანი აღნიშნავს, რომ რუსეთის ჯარები გააგრძელებენ ნიკოლაევის ბლოკადას და თავდასხმებს ხარკოვზე.
„რუსეთი შეეცადა დაემორჩილებინა მთელი უკრაინა, თუმცა მარცხი განიცადა. ახლა ის შეეცდება ქვეყნის ნაწილი მაინც დაიმორჩილოს“, – დასძინა ბაიდენის მრჩეველმა და აღნიშნა ისიც, რომ ეს ყველაფერი შესაძლოა გაგრძელდეს „რამდენიმე თვე ან უფრო მეტხანს“.
სალივანმა ბრიფინგზე ისაუბრა იმაზეც, რომ შტატები ევროპელ მოკავშირეებთან ერთად მუშაობს რუსეთის ფედერაციის წინააღმდეგ ახალი სანქციების დაწესებასა და კიევისთვის იარაღის მიწოდებაზე.
ახალ სანქციებს რუსეთის წინააღმდეგ, სალივანის განცხადებით, მიმდინარე კვირაში უნდა ველოდოთ. სანქციების ეს ეტაპი სავარაუდოდ რუსეთის ენერგეტიკულ ინდუსტრიას შეეხება.
