თამუნა ქარცივაძე შუახევის სოფელ ტაკიძეებში ცხოვრობს. ამბობს, რომ ბავშვობიდან უყვარდა სხვადასხვა ნივთებისთვის ახალი სახის მიცემა, ბოლო დროს კი სტრინგ არტით დაინტერესდა. სტრინგ არტი, ძირითადად ლურსმნებითა და ძაფებით ახალი დეკორაციების და ნივთების შექმნაა. თამუნამ მუნიციპალიტეტის ერთ-ერთ პროგრამაშიც გაიმარჯვა, რითაც საყვარელი საქმე ერთგვარ ბიზნესად აქცია.
„ნივთების შეძენის სურვილი გაჩნდა უცხოეთიდანაც და სამომავლოდ, რა თქმა უნდა, ექსპორტზეც ვფიქრობ“, – ამბობს თამუნა.
„ბავშვობიდან მიყვარდა სხვადასხვა ნივთის კეთება და ძველ, დაზიანებულ ნივთებს ყოველთვის ახალ სახეს ვაძლევდი. შემდეგ უკვე გამიჩნდა იდეა, რომ შემეძინა მასალა და მათგან დამემზადებინა სხვადასხვა დეკორაცია. ძირითადად მიყვარს ყვავილებთან მუშაობა, თუმცა უკვე გადავედი სტრინგ არტის ხელოვნებაზე. ინოვაციური და საინტერესო პროდუქტი იყო და, შესაბამისად, მომხმარებლებიც მალე გაიზარდა. ერთი შეხედვით, მარტივ ნივთებს ჰგავს, თუმცა დამზადების პროცესი ხანგრძლივია და შეიძლება რამდენიმე დღეც კი დასჭირდეს ერთი ნივთის სრულად დამზადებას. ერთი პატარა დეტალიც რომ შეგეშალოს, მერე ყველაფერი თავიდან უნდა გააკეთო. არაერთხელ დავიზიანე ხელები, დამიწვია, ჩაქუჩიც დამირტყამს ბევრჯერ“.
თამუნა ქარცივაძის თქმით, რაღაც პერიოდის შემდეგ აუცილებელი გახდა სპეციალური ტექნიკის გამოყენება: „სწორედ ამ პერიოდში სოციალურ ქსელში გავიგე შუახევის მუნიციპალიტეტის ქალთა ოთახის მიერ გამოცხადებული პროგრამის შესახებ, რომელიც ემსახურებოდა სოფლად მცხოვრების ქალების გაძლიერებას, ამ შემთხვევაში მეწარმეობის მიმართულებით და ზუსტად შეეფერებოდა ჩემს საქმიანობას. გამოვიყენე ეს შანსი, რა თქმა უნდა, მივმართე ქალთა ოთახს, სადაც გამიწიეს რეკომენდაცია და დამეხმარნენ კიდეც“.
პროგრამის ფარგლებში თამუნამ გრავირების აპარატი შეიძინა, რომელიც, როგორც თავად ამბობს, საკმაოდ ძვირადღირებული და მრავალფუნქციურია: „დაახლოებით სამი ათას ლარამდე დაგვიჯდა მისი შეძენა, ადგილზე მოტანა და მონტაჟი“.
თამუნა ქარცივაძის ნამუშევრები
„ამ აპარატით შესაძლებელია ახალი პროდუქტების შექმნა და ვმუშაობ, რომ ახალი მიმართულებით გამოვიყენო პროგრამის ფარგლებში მიღებული ტექნიკა. ძალიან საინტერესო და მრავალფეროვანი მომხმარებელი მყავს. გარდა იმისა, რომ ადგილობრივ ბაზარზე ვყიდი, ნაცნობებისთვის, მეგობრებისთვის, სასაჩუქრედ ხშირად მიკვეთენ. რამდენიმე შემოთავაზება, სურვილი გაჩნდა უცხოეთიდანაც, თუმცა, რაღაც მიზეზების გამო ვერ მოვახერხე ორგანიზება, რომ მიმეწოდებინა და სამომავლოდ, რა თქმა უნდა, ექსპორტზეც ვფიქრობ“, – ამბობს თამუნა ქარცივაძე.
შუახევის მერიის ქალთა ოთახის ხელმძღვანელის, თამილა ფუტკარაძის თქმით, დღეს ქალთა სოციალურ-ეკონომიკური გაძლიერება მნიშვნელოვანია და შუახევის ადგილობრივმა თვითმმართველობამ არა მხოლოდ აჭარის რეგიონში, არამედ საქართველოს მასშტაბით პირველი ინოვაციური პროექტი შეიმუშავა ამ კუთხით.
„მუნიციპალიტეტში რეგისტრირებულ სრულწლოვან ფიზიკურ პირებს, ქალებსა და ქალთა საინიციატივო ჯგუფებს, პროგრამის ფარგლებში ეძლევათ შესაძლებლობა, იდეა აქციონ რეალობად. აღნიშნული პროგრამის მიზანია ქალთა თანაბარი უფლებების უზრუნველყოფა და ეკონომიკური გაძლიერების მხარდაჭერა. ეს ხელს შეუწყობს დამწყები, საშუალო და მცირე მეწარმეობის განვითარებას. პროგრამა წელს მესამედ ხორციელდება, რომლის ამოქმედებიდან დღემდე სულ 7 ბიზნესიდეა იქნა დაფინანსებული“, – ამბობს თამილა ფუტკარაძე.
შუახევის მუნიციპალიტეტში აღნიშნული პროგრამის პოპულარიზაციაში ჩართულია არასამთავრობო ორგანიზაცია „თავისუფალ ჟურნალისტთა სახლი“.სპეციალური პროექტის ფარგლებში, რომელსაც მხარს უჭერს გერმანიის საერთაშორისო თანამშრომლობის საზოგადოება (GIZ), „თავისუფალ ჟურნალისტთა სახლმა“ მოამზადა საინფორმაციო ცნობარები. ასევე, მერიის ჩართულობით მომზადდა სარეკლამო რგოლი, რომელიც გადის აჭარის ტელევიზიისა და ტვ-25-ის ეთერში.
საინფორმაციო შეხვედრა შუახევში
„ჩვენ ვცდილობთ ამ პოგრამის პოპულარიზაციას, ვინაიდან ძალიან მნიშვნელოვანი შესაძლებლობაა შუახევის მუნიციპალიტეტში მცხოვრები ქალებისთვის, რომ განახორციელონ თავიანთი იდეები. დღეს ვმართავთ შეხვედრებს შუახევის მუნიციპალიტეტში მცხოვრებ ქალბთან და ვაწვდით ინფორმაციას პროგრამის შესახებ. ასევე ვავრცელებთ იმ ცნობარებს, რომლებიც მომზადდა პროექტის ფარგლებში“, – ამბობს ასლან ჭანიძე, „თავისუფალ ჟურნალისტთა სახლის“ ხელმძღვანელი.
საინფორმაციო შეხვედრა შუახევში
„ამოვიდნენ სოფელში, გაგვაცნეს პროგრამა, რომლის მიხედვითაც შეგვიძლია სხვადასხვა პროექტი განვახორციელოთ. ძალიან კარგია ეს მხარში დგომა. მადლობელი ვართ და იმედია, გამართლდება ეს პროექტი“, – ამბობს მზისა მიქელაძე, რომელიც შუახევის სოფელ ნენიაში ცხოვრობს.
საინფორმაციო შეხვედრა შუახევში
„რამდენიმე ბენეფიციარი გვყავს, რომლებიც დაფინანსებული არიან ამ პროგრამის ფარგლებში და საკმაოდ წარმატებით გაართვეს თავი. წელს პროგრამის თანხა 5000 ლარამდე გაზარდა მუნიციპალიტეტმა, გაიზარდა თანადაფინანსებაც, რადგან ძირითადად იმ ქალებზე გვაქვს ორიენტაცია, რომელთაც არ აქვთ შემოსავლის წყარო. 15 პროცენტამდე დაიწია თანადაფინანსება, გასულ წელს 20 პროცენტი გვქონდა“, – ამბობს ფატი ჭაღალიძე, შუახევის მუნიციპალიტეტის საკრებულოს წევრი.
მისივე თქმით, მთავარია ქალებს ჰქონდეთ იდეა და მინიმალური თანხა საიმისოდ, რომ საქმე წამოიწყონ. მათ პროექტის დაწერაში კი, ქალთა ოთახიც დაეხმარება.
„თუ იდეა ექნება რომელიმე ქალს, მაგრამ მას არ შეეძლება კონკრეტულად ჩამოაყალიბოს და ფორმა მისცეს პროექტს, ამაში ქალთა ოთახის მენეჯერი ეხმარება. შეუძლიათ ჩვენც მოგვმართონ, დახმარებას გავუწევთ. მოგეხსენებათ, ჩვენს პირობებში დასაქმება ძალიან ჭირს, ამიტომ მნიშვნელოვანია, რომ ქალებმა გამოვნახოთ საქმე, რადგან ქალთა ეკონომიკური გაძლიერება ქალების დამოუკიდებლობასაც უწყობს ხელს. პირველ რიგში, ეს არის მთავარი იდეა ამ პროექტის, რომ რაც შეიძლება მეტი ქალი იყოს დამოუკიდებელი და თავისუფალი“, – ამბობს ფატი ჭაღალიძე.
