რუსეთის თავდასხმის შედეგად დღეს, 9 მარტს, ჩერნობილის ატომურ ელექტროსადგურს მთლიანად შეუწყდა ელექტროენერგიით მომარაგება. ინფორმაციას ამის შესახებ უკრაინის ელექტრომომარაგების ოპერატორი “უკრენერგო” ავრცელებს.
„დაზიანებულია ერთადერთი ელექტროქსელი, რომელიც ამარაგებს ჩერნობილის ატომურ ელექტროსადგურს და მის ყველა ატომურ ობიექტს, რომლებიც ოკუპირებულია რუსული არმიის მიერ. ჩერნობილის ატომურმა სადგურმა დაკარგა ელექტრომომარაგება. მოვუწოდებ საერთაშორისო თანამეგობრობას, სასწრაფოდ მოსთხოვოს რუსეთს ცეცხლის შეწყვეტა და სარემონტო განყოფილებებს მიეცეს საშუალება, აღადგინონ ელექტროენერგიის მიწოდება”, – წერს უკრაინის საგარეო საქმეთა მინისტრი დმიტრო კულება ტვიტერზე.
„სარეზერვო დიზელის გენერატორები გათვლილია ჩერნობილის ატომური ელექტროსადგურისთვის 48-საათიან მუშაობაზე. ამის შემდეგ დახარჯული ბირთვული საწვავის საცავის გამაგრილებელი სისტემები გაჩერდება, რის შემდეგაც რადიაციული გაჟონვა გარდაუვალი გახდება. პუტინის ბარბაროსული ომი მთელ ევროპას საფრთხეში აყენებს. მან ეს სასწრაფოდ უნდა შეწყვიტოს!” – წერს კულება.
დღეს უკრაინის პრეზიდენტის ადმინისტრაციის მრჩეველი მიხაილო პოდოლიაკმა განაცხადა, რომ ატომური ენერგიის საერთაშორისო სააგენტომ ჩერნობილში მონიტორინგის სისტემასთან კავშირი დაკარგა.
დღეს რუსეთის საგარეო უწყების საინფორმაციო დეპარტამენტის ხელმძღვანელმა, მარია ზახაროვამ თქვა, რომ რუსეთის შეიარაღებულმა ძალებმა უკრაინაში კონტროლი დაამყარეს ჩერნობილისა და ზაპოროჟიეს ატომურ ელექტროსადგურებსა და მათ მიმდებარე ტერიტორიებზე.
„ეს ნაბიჯი გადადგმული იქნა მხოლოდ იმ მიზნით, რომ არ დავუშვათ უკრაინის ნაციონალისტური და სხვა ტერორისტული ფორმირებების მიერ, ასევე უცხოეთიდან დაქირავებული პირების მიერ, ამ ქვეყანაში არსებული მდგომარეობის გამოყენება ბირთვული პროვოკაციების ორგანიზებისთვის. ეს რისკები კი რეალურია.
ჩერნობილისა და ზაპოროჟიეს ელექტროსადგურებზე სიტუაცია კონტროლდება ერთდროულად უკრაინელი სპეციალისტებისა და რუსი სამხედროების მიერ. ორივე სადგურზე რადიაციული ფონი ნორმაშია, დანადგარები ზაპოროჟიეს სადგურზე მუშაობს ნორმალურ ტექნოლოგიურ რეჟიმში. შესაბამისად, მეზობელ რაიონებში მცხოვრები მშვიდობიანი მოსახლეობისთვის არ არსებობს რისკები.
