„ხმოვან შეტყობინებებს ვერ გიგზავნით, დავიწყებ თუ არა ლაპარაკს, მაშინვე ტირილს ვიწყებ,“ – მოგვწერა უკრაინელმა ქალმა, ლუდმილა ალექსეევნამ, რომელიც ახლა უკრაინაში, ოკუპირებულ ხერსონში იმყოფება. „ბათუმელებს“ მან უამბო, როგორ ცხოვრობს ახლა რუსი სამხედროების მიერ ოკუპირებული 300-ათასიანი ქალაქი.
ლუდმილამ „ბათუმელებს“ უამბო, რა მდგომარეობაა ახლა ქალაქში, როგორ უწევთ საკვების მოპოვება და როგორ აპროტესტებს მოსახლეობა ქალაქში ოკუპანტების ყოფნას.
„მე ლუდმილა ალექსეევნა ვარ, რუსების მიერ ოკუპირებული ხერსონიდან. რუსმა ოკუპანტებმა ხერსონი აიღეს. დაიღუპნენ უკრაინელი ჯარისკაცები, მაგრამ გაცილებით დიდი მსხვერპლია ოკუპანტების მხარეს. რამდენიმე საცხოვრებელი სახლიც დაიბომბა ხერსონში, არის მსხვერპლი მშვიდობიან მოსახლეობაში.
ქალაქში ტერიტორიული თავდაცვა ძალიან აქტიური იყო.
ხალხი შიშველი ხელებით და მოლოტოვის კოქტეილებით ებრძვის ოკუპანტებს.
ხშირად წყდება ინტერნეტი და სატელეფონო კონტაქტი. ქალაქის ირგვლივ, ყველგან ბრძოლები იყო.
მხოლოდ ერთ დღეში 50 ადამიანი მოკლეს ოკუპანტებმა. მიტინგზე ყოველდღე გამოვდივართ!
საკვები ჯერჯერობით გვაქვს, მაგრამ მარაგის ნარჩენებზე ვართ უკვე გადასული. ყოველდღე გვიწევს მაღაზიის რიგში დგომა, რომ ზეთი ვიყიდოთ. 6 საათი ვიდექით ყველის რიგში.
ლუდმილა ოჯახთან ერთად. ფოტო მან ფეისბუქზე მოგვაწოდა.
სამი შვილიშვილი მყავს, ორი ჩვილი: 8 თვის და 3 თვის, მესამე 8 წლისაა. მთელ ქალაქში ვეძებთ ბავშვთა კვების პროდუქტებს, მაგრამ აღარსადაა.
ბევრი ბლოკპოსტი იყო ქალაქში და გადაადგილება ძალიან საშიშია. გუშინ ეს ბლოკპოსტები აიღეს.
ქალაქში არ უშვებენ ჰუმანიტარულ დახმარებას. ოკუპანტებმა შემოიტანეს ვითომ თავიანთი ჰუმანიტარული დახმარება და თითქოს ხალხს ურიგებდნენ, ცრუ სიუჟეტი გადაიღეს ამაზე, მაგრამ ჩვენები არ მოტყუვდნენ, რამდენიმე გამყიდველი და მოღალატე ბებო კი ნამდვილად მოისყიდეს. მისცეს მათ ეს პროდუქტები და აჩვენეს მაყურებელს, თითქოს ჩვენმა ხალხმა მათი დახმარება მიიღო.
არ ვიცით კიდევ რამდენ დღეს გვეყოფა საკვები. წითელი ჯვარიც კი ვერ შემოდის ჩვენთან.
შუქი, გაზი და წყალი ჯერჯერობით გვაქვს, ვლოცულობთ, არ გათიშონ. ახლა სახლში ვართ, ქალაქს აღარ ბომბავენ.
ბევრი ოკუპანტია ქალაქში. მათ არ აჭმევენ, საკვები არ აქვთ და ჩვენს მაღაზიებს ძარცვავენ, რუსი ჯარისკაცები მოსახლეობას სთხოვენ საჭმელს. დადიან და ითხოვენ, ვინმემ აჭამოთ.
ჰუმანიტარული კორიდორი ხერსონში არ გვაქვს. არც პროდუქტების შემოსატანად, არც მშვიდობიანი მოსახლეობის საევაკუაციოდ. ქალაქში პოლიციაც კი აღარაა.
ნახავდით ალბათ როგორ დაცხრილეს ქალაქ ირპენში მწვანე კორიდორი – დაიღუპა ორი ბავშვი და რამდენიმე ზრდასრული. არის ბევრი დაჭრილი. ჩვენი ადმინისტრაცია ითხოვს კორიდორს, რუსები უარს აცხადებენ. გუშინწინ ქალაქ ახალ კახოვკაში ოკუპანტები მომიტინგეებსაც ესროდნენ“.
______________________________________________
ქალაქი ხერსონი 2 მარტს დაიკავეს რუსეთის შეიარაღებულმა ძალებმა. მას შემდეგ ქალაქში მოსახლეობა ანტისაოკუპაციო აქციებს მართავს. „ხერსონი უკრაინაა“, „ზელენსკი – ყოჩაღ“ – ისმის ვიდეომასალებში, რომელიც ოკუპირებულ ქალაქში გამართული აქციებიდან ვრცელდება.
______________
მთავარ ფოტოზე: ლუდმილა ალექსეევნა ოჯახთან ერთად და ქალაქი ხერსონი, უკრაინელების აქცია ოკუპაციის წინააღმდეგ. 8 მარტი, 2022 წელი. კადრი ვიდეომასალიდან
