უკრაინის გენერალური შტაბის ინფორმაციით, სამოქალაქო ნავიგაციის უსაფრთხოების მიზნით, უკრაინის შეიარაღებული ძალების საზღვაო ძალებმა დახურეს ნავიგაცია შავი ზღვის ჩრდილო-დასავლეთ ნაწილში.
„ამავდროულად, რუსეთის შავი ზღვის ფლოტი აგრძელებს რუსეთის სახმელეთო ჯარების ტაქტიკას, რომლებიც ცდილობენ თავი დაიფარონ მშვიდობიანი მოქალაქეებით.
2022 წლის 2 მარტიდან რუსული გემები სთხოვენ სამოქალაქო გემ HELT-ს შევიდეს შავი ზღვის სახიფათო ზონაში, რათა ოკუპანტებმა დაიფარონ სამოქალაქო ხომალდი, როგორც ადამიანური ფარი, წინააღმდეგ შემთხვევაში, რუსული გემები ცეცხლს გაუხსნიან გემ HELT-ს. ეს სხვა არაფერია თუ არა 21-ე საუკუნის მეკობრეობა,“ – აცხადებს უკრაინის გენშტაბი.
გემ HELT-ის ადგილმდებარეობა შავ ზღვაში, ოდესის მახლობლად / 2.03.2022
გუშინ, პირველ მარტს, უკრაინის საგარეო საქმეთა სამინისტრომ გაავრცელა განცხადება, რომ რუსეთის ფედერაციის შეიარაღებულ აგრესიას უკრაინის წინააღმდეგ თან ახლავს ზღვიდან რუსეთის საზღვაო ძალების მეკობრეობა უკრაინის ტერიტორიულ წყლებში და ექსკლუზიურ საზღვაო ეკონომიკურ ზონაში.
უკვე მე-7 დღეა რუსეთის არმია განუწყვეტლივ უტევს უკრაინას როგორც სახმელეთო, ისე საჰაერო და საზღვაო გზებით. რუსეთის შეჭრას ასეულობით მშვიდობიანი მოქალაქე და სამხედრო ემსხვერპლა. ინტენსიურად იბომბება უკრაინის ქალაქები.
