გაეროს ლტოლვილთა უმაღლესი კომისარიატის [UNHCR] გლობალური კომუნიკაციების ხელმძღვანელი ჯონგ-აჰ გედინი-უილიამსი, უკრაინაში მიმდინარე მოვლენებთან დაკავშირებით აცხადებს, რომ კრიტიკულად მნიშვნელოვანია, რამდენადაც შესაძლებელია სწრაფად მოხდეს ფინანსების მობილიზება უკრაინელი ლტოლვილების დასახმარებლად.
„მდგომარეობა წარმოუდგენლად არამდგრადია. ჩვენ უკვე გვაქვს ინფორმაცია ადამიანების შესახებ, რომლებიც იძულებულნი არიან გაიქცნენ საკუთარი სახლებიდან. არიან ადამიანები რომლებიც გადაადგილდებიან უკრაინის შიგნით, ასევე მეზობელი ქვეყნებისკენ.
რასაკვირველია UNHCR აკეთებს თავის მაქსიმუმს, რომ შეძლოს და აღმოუჩინოს მათ საჭირო ჰუმანიტარული დახმარება.
ჩვენ უკრაინაში ვრჩებით, 115-ზე მეტი თანამშრომლით და ჩვენ ასევე გვყავს იგივე რაოდენობის ხალხი მეზობელ ქვეყნებშიც.
ტრადიციულად, უკრაინა წარმოადგენდა დაუფინანსებელ ოპერაციას, მიუხედავად იმისა, რომ აქ იყო კონფლიქტი და კრიზისი 2014 წლიდან. ასე რომ ჩვენ ახლა ვართ 9%-ზე ნაკლები დაფინანსებით, ამიტომ კრიტიკულად მნიშვნელოვანია, რამდენადაც შესაძლებელია, სწრაფად მოვახდინოთ ფინანსების მობილიზება“ – ამბობს UNHCR-ის გლობალური კომუნიკაციების ხელმძღვანელი ჯონგ-აჰ გედინი-უილიამსი.
გაეროს ლტოლვილთა უმაღლესი კომისარი ფილიპო გრანდი კი აცხადებს, რომ უკრაინაში მიმდინარე სამხედრო მოქმედებების გამო, ამ ქვეყნიდან რამდენიმე ათასი ადამიანი გადავიდა მოლდოვაში, ზოგი რუმინეთში და სხვა ქვეყნებში.
„ჩვენ განსაკუთრებით ვღელავთ ლტოლვილებზე, ადამიანებზე, რომლებიც იძულებულნი არიან გადაადგილდნენ. ჩვენ ვართ უკრაინაში, ჩვენ არ წავსულვართ და მზად ვართ ჩავერთოთ და გავუწიოთ დახმარება მათ, ვისაც ეს სჭირდება… თუმცა, დღეს ძალიან რთულია ამის გაკეთება რადგან მთელი ქვეყნის მასშტაბით, აქტიურად მიმდინარეობს სამხედრო მოქმედებები. მაგრამ იმ წვდომისა და უსაფრთხოების გათვალისწინებით, რაც ჩვენთვისაა შექმნილი, მზად ვართ ვიმოქმედოთ“ – ამბობს ფილიპო გრანდი.
მისივე თქმით, „აქ გამოწვევა იქნება დახმარების გაწევა აქტიური სამხედრო მოქმედებების სიტუაციაში. სწორედ ამიტომაა ძალიან მნიშვნელოვანი, რომ ნებისმიერ სამხედრო სიტუაციაში, მშვიდობიანი მოსახლეობისთვის ჰუმანიტარული დახმარების გაწევაზე წვდომა უზრუნველყოფილი იყოს, დაცული უნდა იყოს მშვიდობიანი მოსახლეობის სიცოცხლე და სამოქალაქო ინფრასტრუქტურა.
ჩვენ პირველ რიგში და ყველაზე მეტად დაგვჭირდება დახმარება უკრაინაში – ჰუმანიტარული ოპერაციებისათვის, მაგრამ ჩვენ შესაძლოა, სამწუხაროდ, ასევე დაგვჭირდეს დახმარება (უკრაინის) მეზობელ ქვეყნებშიც, თუ კრიზისი განაგრძობს ესკალაციას“.
რუსეთი 24 თებერვალს, გამთენიისას შეიჭრა უკრაინაში სრულმასშტაბიანი ომი დაიწყო. შეჭრას წინ უძღოდა რუსეთის პრეზიდენტის მიერ უკრაინის სეპარატისტული დონბასის და ლუგანსკის დამოუკიდებლობის აღიარება.
რუსეთის პრეზიდენტი ვლადიმირ პუტინი აცხადებს, რომ მათი მიზანი „უკრაინის დემილიტარიზაცია და დენაციფიკაციაა“.
პარალელურად, დასავლეთის ქვეყნებმა, მათ შორის, აშშ-მ განაცხადეს, რომ რუსეთის აგრესიის საპასუხოდ აწესებენ მძიმე ეკონომიკურ სანქციებს.
აშშ-მა 26 თებერვლის ღამეს ვოლოდიმირ ზელენსკის ქვეყნიდან ევაკუაცია შესთავაზა, თუმცა უკრაინის პრეზიდენტმა უარი განაცხადა და რჩება კიევში.
____________
ფოტო: უკრაინის შინაგან საქმეთა სამინისტრო
