თურქეთის პრეზიდენტი რეჯეფ თაიფ ერდოღანი უკრაინასა და რუსეთს მოლაპარაკებისკენ კიდევ ერთხელ მოუწოდებს. ამის შესახებ ერდოღანმა დღეს, 24 თებერვალს, განაცხადა.
„თურქეთი კიდევ ერთხელ მოუწოდებს რუსეთსა და უკრაინას, გადაწყვიტონ ყველა წინააღმდეგობა დიალოგის გზით მინსკის შეთანხმებების ფარგლებში.
ჩვენ მხარს ვუჭერთ უკრაინის ბრძოლას ტერიტორიული მთლიანობის დასაცავად და ეს ზელენსკისთან საუბარშიც განვაცხადე.
თურქეთი მზადაა, საჭირო ძალისხმევა გაიღოს თურქეთის მოქალაქეების, ყირიმელი თათრებისა და უკრაინაში მცხოვრები ადამიანების უსაფრთხოების უზრუნველსაყოფად.
რუსეთის სამხედრო ინტერვენცია უკრაინაში ეწინააღმდეგება საერთაშორისო სამართალს და სერიოზულ დარტყმას აყენებს მშვიდობასა და სტაბილურობას რეგიონში.
თურქეთი უარყოფს და მიუღებლად მიიჩნევს რუსეთის სამხედრო ოპერაციას უკრაინის წინააღმდეგ“ – განაცხადა თურქეთის პრეზიდენტმა.
დღესვე განცხადება გააკეთა თურქეთის საგარეო საქმეთა სამინისტრომ. უწყება მიუღებელს უწოდებს რუსეთის მიერ უკრაინაში დაწყებულ სამხედრო მოქმედებებს და მიმართავს მოსკოვს, დაუყოვნებლივ შეაჩეროს აღნიშნული პროცესი.
______________________________________________________________
24 თებერვლის დილას რუსეთის ფედერაციამ უკრაინაში სრულმასშტაბიანი ომი დაიწყო.
რუსეთის პრეზიდენტმა პუტინმა დონბასისა და ლუგანსკის სეპარატისტული რეგიონების დაცვის საბაბით უკრაინაში „სამხედრო ოპერაციის“ დაწყების შესახებ განაცხადა. პუტინმა იარაღის დაყრისკენ მოუწოდა უკრაინელ ჯარისკაცებს.
უკრაინა საყოველთაო მობილიზაციისთვის ემზადება.
____________________
ფოტო: სააგენტო ანადოლუ
