დღეს, 19 თებერვალს, საპროტესტო აქციაზე დაკავებული ექვსივე ოპოზიციონერი გაათავისუფლეს.
უმაღლესი საბჭოში ენმ-ს წევრი დეპუტატის, ელგუჯა ბაგრატიონის პროცესი ბათუმის საქალაქო სასამართლოში სამშაბათს, 22 თებერვალს ჩაინიშნა.
4 მარტამდე გადადეს ბაჩი მექვაბიშვილის, ბონდო თედორაძის, გიგა ნაგერვაძის, ლაშა კილაბერიას და მამუკა ჯევაიშის სასამართლო პროცესები.
ექვსივე მათგანი ადმინისტრაციულ სამართალდარღვევათა კოდექსის 173-ე მუხლით დააკავეს დღეს დილით, სასტუმრო”ჰილტონის” წინ გამართულ საპროტესტო აქციაზე.
ჰილტონში პარტია “ქართული ოცნება” ქალთა ორგანიზაციას აარსებდა. ღონისძიებას ესწრებოდა მმართველი პარტიის ლიდერი ირაკლი კობახიძე. აქციის მონაწილეები სწორედ მასთან შეხვედრას ითხოვდნენ. ირაკლი კობახიძე მათ არ შეხვდა. სასტუმროს წინ მშვიდობიანი მომიტინგეებიდან ექვსი პირი პოლიციამ დააკავა.
“ვერ აიტანა კობახიძემ და რიჟვაძემ, რომ აქციის მონაწილეები ითხოვდნენ ნუგზარ ფუტკარაძის მკვლელობის დროულად გამოძიებას.
ნაცვლად იმისა, რომ გამოსულიყო და ხალხს დალაპარაკებოდა. პოლიცია მიუქსიეს აქციის მონაწილეებს.
ირაკლი დგებუაძე დაუნიშნავთ ბათუმის პოლიციის უფროსად. გრიგოლ ბესელიას, აჭარის პოლიციის ახალ უფროსს თავისი გუნდი შემოჰყავს, როგორც ჩანს.
ეს დგებუაძე არ იყო ფორმაში. როდესაც ვკითხე ვინ იყო, მითხრა, რომ პოლიციის ოფიცერია.
არანაირი ნიშანი არ ჰქონდა, “ტიტუშკას” ჰგავდა, როგორ უნდა ეცნო აქციის მონაწილეებს, რომ პოლიციელი იყო?
მე ვუთხარი, თუ პოლიციის ოფიცერი ხარ, ზონდერივით რატომ იქცევი, ამით ღალატობ და პატივს არ სცემ იმ წოდებას და მუნდირს, რომელიც გაქვს-მეთქი. ეს რომ ვუთხარი გასცა ბრძანება “დააკავეთო”.
დაკავების პროცესში ვითხოვდი განემარტათ რატომ მაკავებდნენ, მაგრამ არ განუმარტავთ”, – უთხრა”ბათუმელებს” აჭარის უმაღლესი საბჭოს დეპუტატმა ენმ-იდან ელგუჯა ბაგრატიონმა.
___
ამავე თემაზე:
„რატომ მომიკალით ძმა“ – ბათუმის საკრებულოს წევრი კობახიძესთან შეხვედრას ითხოვდა
