ნეტგაზეთი • RU

ქედის გამგეობა ამბულატორიებისთვის ავტომობილებს შეისყიდის

ქედის მუნიციპალიტეტის გამგეობამ პირველი მაისისა და მერისის ამბულატორიებისათვის მაღალი გამავლობის ავტომობილების შესასყიდად ტენდერი პირველ მარტს 54 000 ლარზე გამოაცხადა. სატენდერო პირობების მიხედვით, გამარჯვებულმა კომპანიამ ქედის გამგეობას 2015-2016 წელში გამოშვებული და ექსპლუატაციაში არ მყოფი, ბენზინზე მომუშავე, თეთრი ფერის, მარცხენასაჭიანი და განბაჟებული ავტომობილი უნდა შეუსყიდოს. ავტომობილები სპეციალური ხმოვანი საყვირით, ციმციმათი, სტანდარტული დამონტაჟებული საკაცითა და სამედიცინო ჩანთით უნდა იყოს აღჭურვილი.

ავტომობილების შესყიდვაზე გამოცხადებული ელექტრონულ ტენდერში გამარჯვებულმა მაღალი გამავლობის ავტომობილები ქედის გამგეობას ხელშეკრულების გაფორმებიდან 60 დღის განმავლობაში უნდა მიაწოდოს.

სატენდერო წინადადებების მიღება დღეს, 9 მარტს, დასრულდა. ტენდერში განაცხადი მხოლოდ ერთ პრეტენდენტს აქვს შეტანილი – ინდმეწარმე მანუჩარ დუმბაძეს, რომელიც მუნიციპალიტეტს ავტომობილებს 52 400 ლარად სთავაზობს.

 

ნეტგაზეთის მასალების სხვა გამოცემებში გადაბეჭდვის წესი
ავტორი