Batumelebi | სოციალურად დაუცველებს დენის საფასურის გადახდისას საშეღავათო პერიოდი ექნებათ სოციალურად დაუცველებს დენის საფასურის გადახდისას საშეღავათო პერიოდი ექნებათ – Batumelebi
ნეტგაზეთი • RU

სოციალურად დაუცველებს დენის საფასურის გადახდისას საშეღავათო პერიოდი ექნებათ

2022 წლის პირველი იანვრიდან საქართველოში პენსიონერები და სოციალურად დაუცველი მოქალაქეები მოხმარებული ელექტროენერგიის საფასურის გადახდის სპეციალური ვადებით ისარგებლებენ.

კერძოდ, ენერგეტიკისა და წყალმომარაგების მარეგულირებელი კომისიის (სემეკის) გადაწყვეტილებით, მოქალაქეთა მიმართვის საფუძველზე, ელექტროენერგიის საფასურის გადახდა პენსიონერებს ყოველი თვის 16 რიცხვამდე შეეძლებათ, ხოლო ყოველი თვის 22 რიცხვამდე გადახდის საშეღავათო პერიოდით ისარგებლებენ სოციალურად დაუცველი პირები.

სემეკი წერს, რომ გადახდის სპეციალური ვადებით სარგებლობისათვის პენსიონერებმა და სოციალურად დაუცველი ოჯახების ერთიან მონაცემთა ბაზაში რეგისტრირებულმა პირებმა საკუთარი გარემოებების შესახებ ინფორმაცია უნდა მიაწოდონ ელექტროენერგიის მიმწოდებელ კომპანიებს:

  • თბილისში – „თელმიკოს“ („თბილისის ელექტრომიმწოდებელ კომპანიას“);
  • რეგიონებში – „ეპ ჯორჯია მიწოდებას“.

ყველა სხვა საყოფაცხოვრებო მომხმარებელი, რომელიც არ არის პენსიონერი ან სოციალურად დაუცველი, ელექტროენერგიის საფასურს გადაიხდის დარიცხვიდან 15 კალენდარული დღის ვადაში.

„2022 წლიდან მოხმარებული ელექტროენერგიის ქვითარს მომხმარებლები თვის დასაწყისში მიიღებენ, სადაც ასახული იქნება წინა თვის ელექტროენერგიის ხარჯი (არაუმეტეს 30 დღისა)“, – აცხადებს ენერგეტიკისა და წყალმომარაგების მარეგულირებელი კომისია.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com