ახალი პროექტი აბიტურიენტებისთვის Naec-ისგან

„BeNaec – შეამოწმე შენი თავი Naec-თან ერთად“, – ასე  ჰქვია პროექტს, რომელსაც შეფასებისა და გამოცდების ეროვნული ცენტრი აბიტურიენტებსა და სხვა დაინტერესებულ პირებს სთავაზობს, საკუთარი შესაძლებლობების ეროვნულ გამოცდებამდე შესამოწმებლად.

პროექტის მონაწილეებს შესაძლებლობა ექნებათ, შესაბამისი საფასურის გადახდის  [1 საგანი – 10 ლარი] შემდეგ, გაიარონ ერთიანი ეროვნული გამოცდების მსგავსი ტესტირება.

„ცენტრი მონაწილეებს ამ პროექტისათვის შექმნილი ტესტების ვერსიების პირად გვერდზე მიწოდებას, ნაშრომების გასწორებას, სურვილის შემთხვევაში კი გათანაბრებული და სკალირებული ქულების დათვლას და წინა წლის კონტინგენტის შედეგებთან საკუთარი ქულების შედარებას სთავაზობს“, – ნათქვამია Naec-ის მიერ გავრცელებულ განცხადებაში.

გასული წლის კონკურსთან საკუთარი შედეგების შედარებისთვის მონაწილემ უნდა აირჩიოს სასურველი ფაკულტეტები და მინიმუმ 4 გამოცდა [საგანი]. პროგრამა აჩვენებს, თუ რომელ ფაკულტეტზე შეეძლო ჩარიცხვა გასულ წელს ამ ქულებით. თუმცა, როგორც განცხადებაშია ნათქვამი, გასული წლის კონკურსის ქულებით 2016 წლის კონკურსის შედეგების პროგნოზირება   მიზანშეწონილი არ არის.

აღნიშნული პროგრამის შედეგების გამოქვეყნების შემდეგ ტესტების ვერსიებისა და სწორი პასუხების ნახვას ყველა მსურველი უსასყიდლოდ შეძლებს, შეფასებისა და გამოცდების  ეროვნული ცენტრის ვებგვერდზე. ასევე ვებგვერდზე გამოქვეყნდება პროექტში მონაწილეობის მსურველთათვის რეგისტრაციის დაზუსტებული თარიღი და პროცედურები.