Batumelebi | გოროდოკში 1 სახლს მდინარემ საძირკველი გამოაცალა, ექვსს საფრთხე ემუქრება გოროდოკში 1 სახლს მდინარემ საძირკველი გამოაცალა, ექვსს საფრთხე ემუქრება – Batumelebi
RU | GE  

გოროდოკში 1 სახლს მდინარემ საძირკველი გამოაცალა, ექვსს საფრთხე ემუქრება

ბათუმში, გოროდოკის დასახლებაში, მდინარე ბარცხანამ ხიდის ჯებირები და დამბები მოარღვია. ამის შესახებ „ბათუმელებს“ ადგილობრივებმა აცნობეს. მდინარე 6 საცხოვრებელ სახლს უქმნის საფრთხეს. ერთ-ერთ სახლს უკვე გამოაცალა საძირკველი, ხოლო ერთ-ერთი მესაკუთრის ეზო წაიღო.

„ჩვენ წუხელ ღამითვე ვიგრძენით საფრთხე. დაგვირეკეს და გვითხრეს, რომ ადექით, დამბა წაიღოო. ხუთის 15 წუთი იყო. 15 წუთში მოვიდა ანზორ დავითაძე, გამგებელი“, – გვითხრა ერთ-ერთმა მოქალაქემ, რომელიც აცხადებს, რომ საფრთხე რეალურია.

„ერთი „სინკარი“ წინა გაწვიმებაზე წაიღო. დავწერეთ განცხადება მერიაში… დღეს – ხვალ და აჰა, წაიღო. გამგებელი მოვიდა და სურათები გადაიღო. ველოდებით“, – უთხრა „ბათუმელებს“ გოროდოკში მცხოვრებმა კიდევ ერთმა მოქალაქემ, ქეთინო აბუსელიძემ, რომლის სახლსაც ასევე ემუქრება საფრთხე.

აქ მცხოვრებლები ამბობენ, რომ მერია მათ უსაფრთხო ადგილზე გადაყვანას დაჰპირდა.

ამ დროისთვის ბათუმში აღარ წვიმს. თუმცა ამინდის პროგნოზით ისევ წვიმაა მოსალოდნელი.

___

გუშინ საღამოდან კოკისპირული წვიმაა ბათუმში, რის გამოც არაერთი ოჯახი დაზარალდა. ბათუმში დაიტბორა სახლები, არაერთი კომერციული ობიექტი თუ ავტომანქანები. ზარალი ჯერჯერობით დათვლილი არ არის. ბათუმის მერიის განცხადებით, სტიქიის შედეგად დაზარალებულებს ერთჯერადად დაეხმარებიან.

ნეტგაზეთის მასალების სხვა გამოცემებში გადაბეჭდვის წესი
ავტორი
ეთერ თურაძე არის გაზეთ "ბათუმელების" მთავარი რედაქტორი 2001 წლიდან