მთავარი,სიახლეები

ბათუმში კულტურული მემკვიდრეობის ძეგლი დაანგრიეს, დარჩენილია მხოლოდ ფასადი

12.09.2021 • 6401
ბათუმში კულტურული მემკვიდრეობის ძეგლი დაანგრიეს, დარჩენილია მხოლოდ ფასადი

ბათუმში, ბარათაშვილის ქუჩის 37-სა და გორგასლის 42 ნომრებში მდებარე, მე-20 საუკუნის დასაწყისში აგებული ბელეტაჟისგან მხოლოდ ფასადის კედელი დარჩა. სახლს გადახდილი აქვს სახურავი, შიდა მხარე კი მთლიანად დანგრეულია.

ბარათაშვილის 37. კულტურული მემკვიდრეობის ძეგლი მთლიანად დანგრეულია, დარჩენილია მხოლოდ ფასადის კედლები.

ბარათაშვილის #37-ში მდებარე შენობა კულტურული მემკვიდრეობის უძრავი ძეგლების სიაშია. მას ძეგლის სტატუსი 2008 წელს მიენიჭა. შენობა, რომლისგანაც მხოლოდ წინა კედელი დარჩა, ტიპურ ბათუმურ ბელეტაჟს წარმოადგენდა.

კულტურული მემკვიდრეობის ძეგლის ხელყოფა ნებართვის გარეშე სისხლის სამართლის დანაშაულია. შენობის ნანგრევებთან „ბათუმელების“ ყოფნის დროს პოლიციაც მოვიდა.

აჭარის კულტურული მემკვიდრეობის სააგენტოს პრესსამსახურში „ბათუმელებს“ უთხრეს, რომ ადგილზე გასულია მონიტორინგის ჯგუფი და მოკლე ხანში მოგვაწვდიან ინფორმაციას, რა ტიპის ნებართვაა გაცემული აღნიშნულ შენობაზე.

საჯარო რეესტრის მიხედვით, ბარათაშვილის #37-ის მფლობელი კერძო პირი, ზორია წურწუმიაა.

ბათუმი, ბარათაშვილის 37

გადაბეჭდვის წესი


ასევე: