Batumelebi | ქორწილში გამოძახებული პატრული, ანუ რატომ არ აჯარიმებს პოლიცია ორგანიზატორს ქორწილში გამოძახებული პატრული, ანუ რატომ არ აჯარიმებს პოლიცია ორგანიზატორს – Batumelebi
RU | GE  

ქორწილში გამოძახებული პატრული, ანუ რატომ არ აჯარიმებს პოლიცია ორგანიზატორს

ქორწილების და სხვა მასშტაბური ღონისძიებების მოწყობა კანონით აკრძალულია, თუმცა პოლიცია ამ დარღვევაზე არ რეაგირებს. სარიტუალო დარბაზებში ყოველდღიურად ასობით ადამიანი უპრობლემოდ ესწრება ქორწილს, პარალელურად კი, კოვიდის გავრცელების მაჩვენებელი კატასტროფულად იზრდება – დღეს, მაგალითად, 100 000 მოსახლეზე კორონავირუსის გავრცელების დინამიკით საქართველო მსოფლიოში მე-5 ადგილზეა.

სარიტუალო დარბაზების მესაკუთრეები მედიასთან არც მალავენ, რომ ქორწილები შეუზღუდავად იმართება.

დააჯარიმა თუ არა პოლიციამ, მაგალითად, სარიტუალო დარბაზის მესაკუთრე, სადაც გუშინ, 2 აგვისტოს ქორწილს პოლიციელებიც შეესწრნენ? – კითხვით შინაგან საქმეთა სამინისტროს პრესცენტრს მივმართეთ. მოქალაქემ ერთ-ერთ სარიტუალო დარბაზთან გადაღებული ვიდეო გამოგვიგზავნა და გვითხრა, რომ ქორწილში ატეხილი ხმაურის გამო პოლიცია გამოიძახეს. ვიდეოში ჩანს ხალხმრავლობა და 10-ზე მეტი პოლიციელი სარიტუალო დარბაზთან, ისინი მოქალაქეებს ესაუბრებიან.

კანონით, პოლიცია ვალდებულია 2 ათასი ლარით დააჯარიმოს ადამიანი, რომელიც ქორწილს გამართავს. რაც შეეხება სარიტუალო დარბაზს, რომელიც ქორწილის უზრუნველყოფისთვის კანონით 10 ათასი ლარით უნდა დაჯარიმდეს, ქორწილის ორგანიზატორებმა გამოსავალი იპოვეს – კერძო პირსა და სარიტუალო დარბაზს შორის ფორმდება ქირავნობის ხელშეკრულება. შესაბამისად, მთელი პასუხისმგებლობა ქორწილის ორგანიზატორზე გადადის, რომელიც მხოლოდ 2 ათასი ლარით ჯარიმდება.

შინაგან საქმეთა სამინისტროს პრესცენტრიდან არ მოგვაწოდეს ინფორმაცია, პირდაპირ ქორწილში აღმოჩენილმა პატრულმა თუ დააჯარიმა ვინმე აკრძალული „სოციალური ღონისძიებისთვის“.

3 აგვისტოს მონაცემებით, საქართველოში კორონავირუსის 4827 ახალი შემთხვევა დადასტურდა. გასულ დღე-ღამეში საქართველოში 34 ადამიანი გარდაიცვალა კოვიდით.

ნეტგაზეთის მასალების სხვა გამოცემებში გადაბეჭდვის წესი
ავტორი