მთავარი,სიახლეები

რა თქვა საკონსტიტუციოს თავმჯდომარემ კითხვაზე: დაირღვა თუ არა კონსტიტუცია?

06.07.2021 • 1819
რა თქვა საკონსტიტუციოს თავმჯდომარემ კითხვაზე: დაირღვა თუ არა კონსტიტუცია?

„მე არ ვარ პოლიტიკოსი,“ – კითხვაზე თავის არიდება ამ პასუხით სცადა საკონსტიტუციო სასამართლოს თავმჯდომარემ, მერაბ ტურავამ. მას გუშინ, 5 ივლისს, თბილისი პრაიდზე პოლიციელების თვალწინ მოქალაქეების ჩაგვრაზე, ჟურნალისტების ცემასა და კონკრეტული ოფისების დარბევაზე ვკითხეთ ჟურნალისტებმა. დღეს, 6 ივლისს, საკონსტიტუციო სასამართლოში ეროვნულმა ბანკმა საქართველოს კონსტიტუციის 100 წლისთავის აღსანიშნავად საკოლექციო მონეტა წარმოადგინა.

მერაბ ტურავას შევახსენეთ, რომ ის საკონსტიტუციო სასამართლოს თავმჯდომარეა, მაღალი თანამდებობის პირი და მისი შეფასება მნიშვნელოვანია, როცა ქვეყანაში ადამიანების კონსტიტუციით გარანტირებული უფლებები ირღვევა და არსებობს კითხვები იმაზე, რომ ამ ძალადობის უკან ხელისუფლება დგას.

„საკონსტიტუციო სასამართლოს მოსამართლე თავის პოზიციას გამოხატავს გადაწყვეტილებით. ჩემთან სარჩელი რომ მოიტანონ, მე წინასწარ აზრი უნდა მქონდეს გამოთქმული რაღაც საკითხზე? ცოტა კონსტიტუციაში და კანონში ჩაიხედეთ… ქვეყანაში იმიტომ არსებობს კონსტიტუცია, რომ ის უნდა იყოს დაცული, ხოლო როდის არის დარღვეული და როდის დაცული, ამას გადაწყვეტილებით უნდა გაეცეს პასუხი,“ – გვიპასუხა მერაბ ტურავამ.

ამ შემთხვევაში სადავოა არა კონკრეტული სამართლებრივი აქტის კონსტიტუციურობა, არამედ ხელისუფლების მიდგომა და რეაქცია, როცა ქვეყანაში ადამიანის უფლებები ირღვევა – ვუთხარით მერაბ ტურავას. „ბათუმელებმა“ საკონსტიტუციო სასამართლოს თავმჯდომარეს მის უკან ბანერზეც მიუთითა – „საქართველოს კონსტიტუცია 100 წლისაა“ და შეახსენა, რომ პირველი კონსტიტუციითაც იყო გარანტირებული გამოხატვის თავისუფლება.

ის, რაც ნახეთ გუშინ, რა გამოჩნდა თქვენთვის – დაირღვა ადამიანების კონსტიტუციით გარანტირებული უფლებები? – ვკითხეთ მერაბ ტურავას.

„კონკრეტულ შემთხვევაში ირღვევა თუ არა კონსტიტუციური უფლება, ეს არა პოლიტიკური განმარტებების სახით უნდა ჩამოაყალიბოს საკონსტიტუციოს მოსამართლემ, არამედ ჩვენ ჩვენს პოზიციას გამოვხატავთ და ვაცხადებთ სარჩელის საფუძველზე,“ – აღნიშნა მერაბ ტურავამ.

გადაბეჭდვის წესი


ასევე: