Batumelebi | მსოფლიოში მე-40 ადგილი – კოვიდით დაღუპვის მაჩვენებელი საქართველოში მილიონ მოსახლეზე  მსოფლიოში მე-40 ადგილი – კოვიდით დაღუპვის მაჩვენებელი საქართველოში მილიონ მოსახლეზე  – Batumelebi
RU | GE  

მსოფლიოში მე-40 ადგილი – კოვიდით დაღუპვის მაჩვენებელი საქართველოში მილიონ მოსახლეზე 

პანდემიის დაწყებიდან დღემდე მსოფლიოში კოვიდით სულ 3 717 518 ადამიანი გარდაიცვალა, საერთაშორისო სტატისტიკური მონაცემების მთვლელის worldometers-ის მონაცემებით, მსოფლიოში კოვიდით ყოველ მილიონ მოსახლეზე  476.9 ადამიანია დაღუპული.

მილიონ მოსახლეზე კოვიდით გარდაცვალების მონაცემს ყველა ქვეყანაზე ცალ-ცალკე ითვლიან. worldometers-ის მიხედვით, ეს მაჩვენებელი ყველაზე მაღალია პერუში, სადაც იგი 5 551-ს უტოლდება. მეორე ადგილზეა უნგრეთი, მილიონ მოსახლეზე 3 094 გარდაცვალებით, მესამეზე კი ბოსნია და ჰერცოგოვინა – 2 861 გარდაცვალებით.

worldometers-ზე მოცემულ 222 ლოკაციას შორის, რომელშიც ქვეყნებთან ერთად კუნძულებიც შედის, საქართველო ამ მაჩვენებლით მე-40 ადგილზეა, ყოველ მილიონ მოსახლეზე კოვიდით გარდაცვალების მაჩვენებელი საქართველოში 1 224-ია.

იმ ქვეყნებიდან, სადაც კორონავირუსის გავრცელება დღემდე საკმაოდ მაღალია, ამ მაჩვენებლით გვისწრებს იტალია, რომელიც მე-14 ადგილზეა, ასევე გაერთიანებული სამეფო, რომელიც მე-17 ადგილზეა, აშშ მე-18 ადგილზე, ესპანეთი 22-ე, საფრანგეთი კი 23-ე ადგილზეა.
სამხრეთ კავკასიის რეგიონს რაც შეეხება, სომხეთი ამ სიაშ 31-ე ადგილზეა, აქ გარდაცვალების მაჩვენებელი მილიონ მოსახლეზე 1500ს შეადგენს, აზერბაიჯანი კი სიაში 81-ე ადგილზეა, მილიონ მოსახლეზე გარდაცვალების მაჩვენებელი აქ 482-ია.

მნიშვნელოვანია, რომ ვორლდომეტრის მონაცემებით, საქართველოს მოსახლეობა 3 982 096 ადამიანია. საქსტატის მიხედვით კი, რომელიც 2014 წლის საყოველთაო აღწერის მონაცემებს ეყრდნობა, საქართველოს მოსახლეობა 3 728 600 ადამიანია.

ეს იმას ნიშნავს, რომ სიკვდილიანობის მაჩვენებელი საქართველოში კიდევ უფრო მაღალია, ვიდრე მე-40 ადგილი.

საქართველოში კოვიდით სულ 4 876 ადამიანი გარდაიცვალა, ჯამში კოვიდით ინფიცირების მაჩვენებელი 347 762-ია, გამოჯანმრთელდა 331 680 ადამიანი.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან