აჭარის უმაღლესი საარჩევნო კომისიის თავმჯდომარის კანდიდატად დავით კვაჭაძის დასახელებასთან დაკავშირებით აჭარის მთავრობის თავმჯდომარემ, არჩილ ხაბაძემ განმარტა, რომ მას ჰქონდა მოლოდინი, რომ წარდგენილი კანდიდატებიდან ნებისმიერის დასახელების შემთხვევაში მის მიმართ იგივე პრეტენზიები ექნებოდათ, რაც ახლა აქვთ:
„ სულ სხვადასხვა განცხადებებს აკეთებდნენ, სულ მარჩიელობდნენ. პარმენ ჯალაღონია რომ ამერჩია, იტყოდნენ, მისი კაციაო. ქარცივაძეც ქართულ ოცნებასთან ასოცირდებოდა, რადგან ის პოლიტიკური პარტიის წევრი იყო და მივიღე ეს გადაწყვეტილება. ეს პიროვნება არის გამოცდილი და ამევე დროს ჩემთვის უცხო პიროვნებაა. ვერავინ იტყვის, რომ გადაწყვეტილება პირადი სიმპათიის საფუძველზე მივიღე“, – განმარტა არჩილ ხაბაძემ უსკოს თავმჯდომარეობის კანდიდატის შერჩევასთან დაკავშირებით.
არჩილ ხაბაძემ არჩევანი კომისიის მიერ წარდგენილ სამ კანდიდატს შორის გააკეთა. მათ შორის ერთი, მისი აპარატის თანამშრომელი პარმენ ჯალაღონია, მეორე დავით ქარცივაძე – ბათუმის მერიის თანამშრომელი და ფრაქცია „ქართული ოცნების“ ყოფილი სპეციალისტი უმაღლეს საბჭოში, მესამე კი „არასამთავრობო სექტორიდან“ საჯარო საქტორში მუშაობის გამოცდილებით დავით კვაჭაძე იყო, რომელზეც ასევე ამბობდნენ, რომ „ქართულ ოცნებასთან“ დაახლოებული პირია. არჩილ ხაბაძემ არჩევანი ამ უკანასკნელზე შეაჩერა.
დავით კვაჭაძის უსკოს თავმჯდომარედ დანიშვნის საკითხს უმაღლეს საბჭოში ხვალ, 4 თებერვალს განიხილავენ. დავით კვაჭაძეს დღეს უმაღლეს საბჭოში „ქართული ოცნების” ფრაქცია ხვდება, თუმცა 9-წევრიანი ფრაქციის მხარდაჭერა არ არის საკმარისი – დავით კვაჭაძეს უსკოს თავმჯდომარედ დანიშვნისთვის უმაღლესი საბჭოს 11 წევრის მხარდაჭერა სჭირდება. „თავისუფალი დემოკრატების” ფრაქცია მხარს არ უჭერს დავით კვაჭაძის კანდიდატურას. შესაბამისად, უსკოს თავმჯდომარეობის კანდიდატს „ნაციონალური მოძრაობის“ მხარდაჭერაც სჭირდება.
ამ საკითხზე კონსულტაციები დღესაც მიმდინარეობს.
