მიწის ნაკვეთები ზღვასთან ახლოს – ქონების სააგენტოს შეთავაზება ბიზნესს

პროექტის – „100 შეთავაზება ბიზნესს“ ფარგლებში სახელმწიფო ქონების ეროვნული სააგენტო ქობულეთში, ზღვასთან ახლოს,  მიწის რამდენიმე ნაკვეთს ყიდის. სააგენტოს ელექტრონულ აუქციონზე გატანილი აქვს ორი მიწის ნაკვეთი ბუკნარში, ჯამში 7000 კვ.მდე ტერიტორია. ქონების საწყისი ფასი 890 000 ლარია.

გასაყიდი ნაკვეთი ბუკნარში

სააგენტო ყიდის ასევე 25 547 კვ.მეტრ არასასოფლო-სამეურნეო დანიშნულების მიწის ნაკვეთს ქობულეთში, რუსთაველის ქუჩაზე. ქონების საწყისი ფასი 815 000 ლარია.

ამის პარალელურად, საწარმოს ამოქმედების პირობით, აუქციონზე გატანილია ორი ნაკვეთი ბათუმში, ადლიის დასახლებაში. იყიდება 1470 კვ.მეტრი მიწის ფართობი, ამ ადგილზე არანაკლებ 300 000 ლარის ინვესტიციის განხორციელებისა და  საწარმოს ამოქმედების პირობით.

მთავრობა აუქციონის წესით ყიდის კიდევ ერთ ნაკვეთს ადლიაში. ნაკვეთის ფართობი 4409 კვ. მეტრია, ქონების საწყისი ფასი: 470 000 ლარი.

საქართველოს ეკონომიკისა და მდგრადი განვითარების სამინისტრო, ქონების ეროვნულ სააგენტოსთან ერთად, 2019 წლიდან ახორციელებს პროექტს – „100 საინვესტიციო შეთავაზება ბიზნესს“.

შეთავაზებები განკუთვნილია ადგილობრივი და საერთაშორისო ინვესტორებისთვის როგორც მსხვილი, ისე მცირე ბიზნესისთვის და ითვალისწინებს სახელმწიფო ქონების როგორც გაყიდვას, ასევე გრძელვადიანი იჯარის წესით გასხვისებას.