Batumelebi | ქარტია მოუწოდებს შსს-ს, დროულად გამოიძიოს „ფორმულას“ თანამშრომლებზე თავდასხმის ფაქტი ქარტია მოუწოდებს შსს-ს, დროულად გამოიძიოს „ფორმულას“ თანამშრომლებზე თავდასხმის ფაქტი – Batumelebi
RU | GE  

ქარტია მოუწოდებს შსს-ს, დროულად გამოიძიოს „ფორმულას“ თანამშრომლებზე თავდასხმის ფაქტი

საქართველოს ჟურნალისტური ეთიკის ქარტია გმობს „ფორმულას“ თანამშრომლებზე განხორციელებულ ძალადობას და მიიჩნევს, რომ მომხდარი სწრაფად და ეფექტიანად უნდა გამოიძიონ.

ქარტია მოუწოდებს ხელისუფლებას, დაიცვას ჟურნალისტთა უსაფრთხოება.

ტელეკომპანია „ფორმულა“ ავრცელებს ინფორმაციას,  რომ ტელეკომპანიის თანამშრომლებს თავს დაესხნენ და ფიზიკურად იძალადეს მათზე. „ფორმულას“ თქმით, ერთ-ერთ მათ თანამშრომელს ფიზიკურად გაუსწორდნენ, მეორეს კი ავტომანქანა დაუმტვრიეს. მედიის ინფორმაციით, თავდასხმა კრიტიკულ მედიასაშუალებაში მუშაობას უკავშირდება.

ბოლო პერიოდში გახშირდა ჟურნალისტთა თავდასხმის ფაქტი, რასაც არასამთავრობო სექტორი, მათ შორის, ჟურნალისტური ეთიკის ქარტია, ერთი მხრივ, ხელისუფლების აგრესიულ რიტორიკას და, მეორე მხრივ, სამართალდამცავი უწყებების მხრიდან ჟურნალისტების თავდასხმის ფაქტებზე არასათანადო რეაგირებას უკავშირებს.

2021 წლის 25 თებერვალს ტელეკომპანია „ფორმულას“ წამყვანს, ვახო სანაიას და მის ოჯახს თავს დაესხნენ. ჟურნალისტის თქმით, თავდასხმის მოტივი იმ აგრესიული პროპაგანდის შედეგი იყო, რასაც ხელისუფლება კრიტიკული მედიის მიმართ ეწევა.

2021 წლის 6 მარტს „მთავარი არხის“ ჟურნალისტს, ემა გოგოხიას მესტიის მერი დაემუქრა, მოგვიანებით კი, მედიასაშუალების გადამღებ ჯგუფს ავტომობილი დაუზიანეს.

2021 წლის 16 თებერვალს ჭიათურის მუნიციპალიტეტის ერთ-ერთ სოფელში მედიაჰოლდინგ „კვირას“ გადამღებ ჯგუფს არაფხიზელ მდგომარეობაში მყოფი პირები თავს დაესხნენ და ჟურნალისტურ საქმიანობაში ხელი შეუშალეს.

აღსანიშნავია, რომ ჟურნალისტთა თავდასხმისა და ქონების დაზიანების ფაქტები კვლავ გამოუძიებელია.

ქარტია მოუწოდებს ხელისუფლებას, დროულად გამოიძიოს ჟურნალისტთა თავდასხმის, საქმიანობაში უკანონო ხელშეშლისა და ქონების დაზიანების ყველა ფაქტი.

ამავე თემაზე: 

„ეს ქვეყანაში არსებული პოლარიზაციის გაგრძელებაა“ – თავდასხმა „ფორმულას“ თანამშრომლებზე

ნეტგაზეთის მასალების სხვა გამოცემებში გადაბეჭდვის წესი
ავტორი