დღეს, 25 მარტს, ბათუმში ჩამოსულ საქართველოს პრემიერ-მინისტრს, ირაკლი ღარიბაშვილს ჟურნალისტებმა შეკითხვა დაუსვეს აჭარის მთავრობის თავმჯდომარე, თორნიკე რიჟვაძე დატოვებს თუ არა თანამდებობას, რის შესახებაც ინფორმაცია მედიაში ბოლო დღეებში ვრცელდება.
„ბატონო თორნიკე რიჟვაძე არის ერთ-ერთ ყველაზე წარმატებული მმართველი, ეფექტური მენეჯერი, ჩვენი გუნდის წევრი.
აბსოლუტურად გაუგებარი და ყოველგვარ საფუძველს მოკლებულია ეს აჟიოტაჟი. ეს არის აბსურდი და არავითარი სერიოზული კომენტარი ამაზე არ შეიძლება გავაკეთო“ – განაცხადა ირაკლი ღარიბაშვილმა.
თორნიკე რიჟვაძე აჭარის მთავრობის თავმჯდომარის პოსტზე 2018 წელს, მამუკა ბახტაძის პრემიერ-მინისტრობის დროს დაინიშნა. ირაკლი ღარიბაშვილი მესამე პრემიერ-მინისტრია, რომლის მთავრობის ფარგლებში რიჟვაძე თანამდებობას ინარჩუნებს.
