Batumelebi | ტიკარაძემ „ასტრაზენეკას“ ვაქცინა გაიკეთა ტიკარაძემ „ასტრაზენეკას“ ვაქცინა გაიკეთა – Batumelebi
RU | GE  

ტიკარაძემ „ასტრაზენეკას“ ვაქცინა გაიკეთა

საქართველოს ჯანდაცვის მინისტრმა, ეკატერინე ტიკარაძემ დღეს, 23 მარტს, „ასტრაზენეკას“ ვაქცინა ტელეკამერების წინ გაიკეთა.

კადრი პირდაპირი ეთერიდან

ტიკარაძემ ვაქცინა საჩხერის კლინიკაში გაიკეთა.

„გუშინ გაისმა საყვედური საჩხერის კლინიკის და მედპერსონალის მიმართ, რომ ისინი უარს აცხადებენ ვაქცინაციის პროცესზე. რა თქმა უნდა, ვგრძნობ პასუხისმგებლობას კლინიკაზე, რომლის დირექტორი რამდენიმე წელი ვიყავი, ამ კლინიკის სამედიცინო პერსონალს გააჩნია მრავალწლიანი ტრადიცია სამედიცინო სფეროში მუშაობის და დარწმუნებული ვარ, ისინი გრძნობენ მაღალ საზოგადოებრივ პასუხისმგებლობას.

სამედიცინო პერსონალის გამჭვირვალე ჩართულობა სამედიცინო სფეროში არის ძალიან მნიშვნელოვანი. ჩავთვალე საჭიროდ აქ ჩატარებულიყო ჩემი ვაქცინაცია, ეს იქნებოდა სიმბოლურიც და მოტივის მომცემიც, როგორც საჩხერის პერსონალისთვის, ისევე რეგიონისთვის,“ – განაცხადა ეკატერინე ტიკარაძემ.

„ასტრაზენეკას“ ვაქცინას რომ გაიკეთებდა, მინისტრმა მას შემდეგ განაცხადა, როცა 18 მარტს საქართველოში 27 წლის ახალციხელი ექთანი გარდაიცვალა „ასტრაზენეკას“ ვაქცინის გაკეთების შემდეგ, სავარაუდოდ, ანაფილაქსიური შოკის შედეგად.

„ასტრაზენეკას“ ვაქცინა სახელწოდებით – AZD1222 – ოქსფორდის უნივერსიტეტისა და ბრიტანულ-შვედური ფარმაცევტული კომპანიის, „ასტრაზენეკას“ პროდუქტია. ვაქცინა დაშვებული იქნა 2020 წლის 30 დეკემბერს.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com