სიახლეები

ბათუმის საკრებულომ 2016 წლის ბიუჯეტი დაამტკიცა

25.12.2015 • 2028
ბათუმის საკრებულომ 2016 წლის ბიუჯეტი დაამტკიცა

2016 წლის ბიუჯეტის პროექტი საკრებულოს დასამტკიცებლად ბათუმის მერმა, გიორგი ერმაკოვმა წარუდგინა. ბიუჯეტი 141 462 900 ლარით განისაზღვრა. ქალაქის მთავარი საფინანსო დოკუმენტის დამტკიცებას მხარი ოპოზიციურმა ფრაქციებმა „თავისუფალმა დემოკრატებმა“ და „ერთიანმა ნაციონალურმა მოძრაობამ“ არ დაუჭირა.

სხდომაზე წარმოდგენილი პროექტით მომავალ წელს ბათუმის მერია  ინფრასტრუქტურულ პროგრამებზე 75 მილიონ 157 000  ლარის დახარჯვას გეგმავს.  პროგრამები  საგზაო, სატრანსპორტო ინფრასტრუქტურის სერვისის , საბაზისო კომუნალური ინფრასტრუქტურის  სერვისების განვითარებას; ქალაქის გაფორმებას და სარეკრეაციო ინფრასტრუქტურის განვითარებას; ბინათმესაკუთრეთა ამხანაგობების მხარდაჭერას, ბინათმშენებლობასა და ავარიული შენობების რეაბილიტაცია – დემონტაჟს; მუნიციპალური სასაფლაოების მოწყობასა და მოვლა-პატრონობას გულისხმობს.
14 მილიონ 271 ათასი ლარი გაითვალისწინეს განათლების მიმართულებით. ამ პრიორიტეტის ფარგლებში დაფინანსდება სკოლამდელი განათლების, ზოგადი განათლების, ასევე, პროფესიული განვითარებისა და უმაღლესი განათლების ხელშეწყობის პროგრამები.
კულტურის, რელიგიის, ახალგაზრდობის ხელშეწყობისა და სპორტის პროგრამების მხარდაჭერისთვის 2016 წლისთვის 16 მილიონ 198  000 ლარია გამოყოფილი.
მოსახლეობის ჯანმრთელობის დაცვისა და სოციალური უზრუნველყოფის პროგრამებისთვის გათვალიწინებულია 10 მილიონ 997 000 ლარი.
მომავალი წლის ბიუჯეტი 15 ხმით 5-ის წინააღმდეგ დაამტკიცეს. ბიუჯეტის პროექტისთვის საკრებულოს ოპოზიციური ფრაქციების წევრებს მხარი არ დაუჭერიათ. პროექტის განხილვას არ ესწრებოდნენ ფრაქცია ,,ერთიანი ნაციონალური მოძრაობის“ წარმომადგენლები. ამ ფორმით მათ ფრაქციის თავმჯდომარისთვის გიორგი კირთაძისთვის თანამომხსენებლად გამოსვლაზე  საკრებულოს თავმჯდომარის უარი გააპროტესტეს.

საკრებულოს თავმჯდომარემ ირაკლი ჭეიშვილმა განმარტა, რომ ბიუჯეტთან დაკავშირებით თანამომხსენებლად  ოპოზიციური ფრაქციის წევრის გამოსვლას რეგლამენტი არ ითვალისწინებს. თუმცა მოგვიანებით მან ამაზე უარი არ უთხრა ფრაქცია „თავისუფალი დემოკრატების“ თავმჯდომარეს კობა ჩხეიძეს.

გადაბეჭდვის წესი


ასევე: