ხვალ, 25 დეკემბერს ბათუმის საკრებულო 2016 წლის ბიუჯეტის დამტკიცებას გეგმავს. პროექტის მიხედვით, მომავალი წლის ბიუჯეტი 141 მილიონი ლარი იქნება. საკრებულოს ოპოზიციას კი თითქმის იდენტური პრეტენზიები აქვს, რაც გასული წლის ბოლოს ჰქონდა. ამის შესახებ „ბათუმელებს“ საკრებულოს წევრი „თავისუფალი დემოკრატებიდან“ კობა ჩხეიძე ესაუბრა.
მერიამ განსახილველად შემოიტანა 137-მილიონიანი ბიუჯეტი, რომელზეც მოვამზადეთ რეკომენდაციები. ამის შემდეგ მერიამ უკან დააბრუნა და სამი მილიონით გაზარდა ბიუჯეტი. ჯანდაცვის კომისია იყო პირველი, რომელიც შეიკრიბა ბიუჯეტთან დაკავშირებით და თავისუფალმა დემოკრატებმა დავსვით კითხვა, რომელ ბიუჯეტს გავიხილავთ? – იმ 137-მილიონიან ბიუჯეტს, რომელზეც ვიმსჯელეთ და შენიშვნები დავწერეთ თუ სამი მილიონით გაზრდილ ბიჯეტს. ამ სამ მილიონზე არ უმსჯელია საკრებულოს არც ერთ წევრს. ეს სამი მილიონი მერიის მიერ იყო შეგნებულად გადადებული იმისთვის, რომ შენიშვნებზე დაფინანსებების გაზრდით ეპასუხათ. აი მე ვცდილობ მეტი გავაკეთოო, მაგრამ პრაქტიკულად ეს არის ბიუჯეტის არასწორი დაგეგმვა.
და რა პასუხი აქვს მერიას, საიდან გაჩნდა ახლა ეს სამი მილიონი?
ამაზე უნდა გვიპასუხონ კომისიის სხდომაზე. მთავარი აქ არის ის, რომ მერიამ აიღო და მის მიერ ინიცირებულ ბიუჯეტში ისე გაზარდა თანხა, რომ საკრებულოსთან არც შეუთანხმებია. დამატებულ სამ მილიონ ლარზე მსჯელობა საკრებულოს წევრებმა ვეღარ შეძლეს.
გასული წლის ბოლოსაც იგივე პრობლემა იყო – გაზრდილი ბიუჯეტში შენიშვნების შეტანა და უკან დაბრუნება ვეღარ შეძლო საკრებულომ. ექსპერტებმა ეს საკანონმდებლო კაზუსით ახსნეს. მაშინ თქვენ თქვით, რომ ამ საკითხის მოგვარებაზე პარლამენტში „თავისუფალი დემოკრატები“ იმუშავებდნენ…
დიახ, მაგრამ შემდეგ ნოტარიუსის ფუნქციაც კი ჩამოართვეს საკრებულოს. პარლამენტმა განახორციელა ცვლილებები, რითაც უარესობისკენ წავიდა საქმე. ჩვენი პარტია უმცირესობაშია და ვერ მოახდინა ვერანაირი ზემოქმედება გადაწყვეტილების მიღებაზე. ამ ცვლილებებით – ქონების განკარგვის, ტარიფების დადგენის, აიპ-ებში სხვადასხვა საკითხის გადაწყვეტის უფლება მერს ერთპიროვნულად მიენიჭა. საკრებულოსთან შეთანხმებაც კი აღარ არის საჭირო.
ამის უფლება მერიას აქვს, როგორც ვიცით…
უფლებები, რა თქმა უნდა, მერიასაც გააჩნია, მაგრამ მან შემოიტანა ბიუჯეტი და თქვა – მე მაქვს ეს ხედვა მომავალი წლის გეგმებთან დაკავშირებითო. ჩვენ მივწერეთ შენიშვნები. შენიშვნებზე მოგვწერა პასუხი და ეს პასუხი ძირითადად იყო – არა. მეორე საკითხია ის, რომ თანხა დაამატა და საკრებულოს წევრებს წაართვა ამ თანხაზე მსჯელობის უფლება. მერიამ თავადაც შეიტანა ბიუჯეტში კორექტივები, მაგალითად, სანიაღვრე არხებისთვის გამოყოფილი მილიონ 800 000 გადაიტანა სხვა პროგრამაში. უმრაველესობას ასეთი პოზიცია აქვს – ამატებენ, ხომ არ აკლებენ მხარი დავუჭიროთო. ეს არ არის სწორი და ეს მნიშვნელოვანი პრობლემაა.
