Batumelebi | შარშან 65 წელს გადაცილებული 2 ქალი გააუპატიურეს შარშან 65 წელს გადაცილებული 2 ქალი გააუპატიურეს – Batumelebi
RU | GE  

შარშან 65 წელს გადაცილებული 2 ქალი გააუპატიურეს

შარშან 65 წელს გადაცილებული ორი ქალი გააუპატიურეს, ამავე ასაკის კიდევ ერთი ქალი სექსუალური ხასიათის სხვაგვარი ქმედების მსხვერპლი გახდა. 2020 წელს ამ ასაკის ადამიანები სექსუალური ხასიათის ძალადობის მსხვერპლი არ გამხდარან. სექსუალური ხასიათის დანაშაულის სტატისტიკა „ბათუმელებმა“ გენერალური პროკურატურიდან გამოითხოვა.

ოფიციალური მონაცემებით, სექსუალური ხასიათის დანაშაულს ყველაზე ხშირად 18-დან 25 წლამდე ასაკის ადამიანები სჩადიან. გასულ წელს სულ 62 პირის წინააღმდეგ დაიწყო სისხლის სამართლებრივი დევნა სქესობრივი თავისუფლებისა და ხელშეუხებლობის წინააღმდეგ გათვალისწინებულ მუხლების შესაბამისად [სისხლის სამართლის კოდექსის 137-ე – 141-ე მუხლები], 2020 წელს კი, ამავე მუხლებით 18-დან 25 წლამდე 46 პირის დევნა დაიწყო.

სტატისტიკაში გვხვდებიან არასრულწლოვნებიც – შარშან და წელსაც სექსუალური ხასიათის დანაშაული, პროკურატურის ინფორმაციით, 3-3 მოზარდს ჩაუდენია.

სექსუალური ხასიათის დანაშაულის ჩადენაში ბრალდებულები არიან 65 წელს გადაცილებული ადამიანებიც. ასეთი წელს სულ 5 პირია, გასულ წელს იყო 4.

სექსუალური ხასიათის დანაშაულებს შორის ყველაზე ხშირად დანაშაული ჩადენილია სსკ-ის 140-ე მუხლის შესაბამისად, რაც გულისხმობს სექსუალური ხასიათის შეღწევას 16 წელს მიუღწეველთან. 2020 წლის 16 ნოემბრამდე 37 შემთხვევა დაფიქსირდა, 2019 წელს – 77.

არასრულწლოვანი დაზარალებულებიც ყველაზე მეტია 140-ე და 141-ე მუხლებით ჩადენილ დანაშაულებზე. ორივე მუხლი 16 წლამდე პირთან სექსუალური ხასიათის დანაშაულის ჩადენას გულისხმობს. შარშან ამ მუხლებით ჩადენილი დანაშაულის შედეგად სულ 132  არასრულწლოვანი დაზარალდა, წელს – 83.

ნეტგაზეთის მასალების სხვა გამოცემებში გადაბეჭდვის წესი
ავტორი