აჭარის ფინანსთა და ეკონომიკის მინისტრმა დავით ბალაძემ, ბათუმში ბარაკებში მაცხოვრებელი მოსახლეობისთვის ახალი საცხოვრებელი სახლის მშენებლობას საძირკველი ჩაუყარა. მინისტრმა, ქალაქის მერთან გიორგი ერმაკოვთან, საქართველოს ბანკის წარმომადგენელთან არჩილ ჯანყარაშვილთან და კომპანიის დირექტორთან ლევან წივწივაძესთან ერთად სიმბოლური კაფსულა ჩადო.
„ბარაკული დასახლება გაუქმდება და იქ მცხოვრები ოჯახები მალე ახალ თანამედროვე ტიპის სახლში იცხოვრებენ. საუბარია 1,8 მილიონი დოლარის ინვესტიციაზე. პროექტს როგორც სოციალურ-ეკონომიკური, ასევე ტურისტული დატვირთვა აქვს“- განაცხადა დავით ბალაძემ.
სამინისტროს ინფორმაციით, პროექტის ფარგლებში ბათუმში ამ დროისთვის 3 საცხოვრებელი სახლის მშენებლობა მიმდინარეობს, რომელთა ჯამური საინვესტიციო ღირებულება 9 მილიონ ლარამდეა.
საცხოვრებელი სახლის მშენებლობა შპს „ბი აი სი“-მ „ახალი საცხოვრებელი სახლები ბათუმში ბარაკების ნაცვლად“ პროგრამის ფარგლებში დაიწყო.
სახლის მშენებლობით 1,8 მლნ დოლარის ინვესტიცია განხორციელდება. 12 სართულიან შენობაში 78 ბინა განთავსდება. პროექტში ჯამში 80 ადამიანი დასაქმდება.
ფინანსთა და ეკონომიკის სამინისტროს ინფორმაციით, ტერიტორიაზე კომპანიამ 509 კვ.მეტრზე განთავსებული 3 სახლის დემონტაჟი უკვე განახორციელა. ოჯახებზე კომპენსაციის სახით გაცემულმა თანხამ დაახლოებით 100 000 დოლარი შეადგინა. ბარაკებში მცხოვრებ ოჯახებს ახალ საცხოვრებელ სახლში საკუთრებაში სულ 1300 კვ.მ ფართი გადაეცემა. მშენებლობა 2017 წელს დასრულდება.
