Batumelebi | ბათუმში უსკოს შენობასთან ოპოზიცია საპროტესტო აქციას მართავს ბათუმში უსკოს შენობასთან ოპოზიცია საპროტესტო აქციას მართავს – Batumelebi
RU | GE  

ბათუმში უსკოს შენობასთან ოპოზიცია საპროტესტო აქციას მართავს

ბათუმში, აჭარის უმაღლესი საარჩევნო კომისიის [უსკო] შენობასთან, ოპოზიციური პარტიების საპროტესტო აქცია იმართება. პარალელურად, დღეს, 14 ნოემბერს, უსკოს სხდომაც იმართება. ადგილზე მობილიზებულია პოლიცია.

უსკოს დღის წესრიგშია რამდენიმე საკითხი, მათ შორის, აჭარის უმაღლესი საბჭოს 2020 წლის 31 ოქტომბრის პროპორციული და მაჟორიტარული საარჩევნო სისტემებით ჩატარებული არჩევნების შედეგების შეჯამება.

უსკომ უნდა მიიღოს ასევე განკარგულება – აჭარის ავტონომიური რესპუბლიკის უმაღლესი საბჭოს 2020 წლის 31 ოქტომბრის არჩევნების მეორე ტურის დანიშვნის შესახებ.

ოპოზიციური პარტიების წარმომადგენლები და მათი მხარდაჭერები აცხადებენ, რომ არჩევნები გაყალბდა, ამიტომ არანაირი შემაჯამებელი ოქმები უსკოში არ უნდა შედგეს. „ივანიშვილის მონებო“ – სკანდირებენ აქციის მონაწილეები.

უმაღლესი საარჩევნო კომისიის სხდომა პროტესტის ნიშნად დატოვა კომისიის წევრმა „ნაციონალური მოძრაობიდან“, კახა ჯაიანმა.

აჭარის უმაღლესი საბჭოს მაჟორიტარული არჩევნების მეორე ტური ორ მაჟორიტარულ ოლქში უნდა ჩატარდეს. რაც შეეხება პროპორციულ არჩევნებს, 5%-იანი ბარიერი მხოლოდ ორმა პარტიამ – „ქართულმა ოცნებამ“ და „ნაციონალურმა მოძრაონამ“ გადალახა.

ოპოზიცია აცხადებს, რომ არჩევნები გაყალბებულია და მეორე ტურში მონაწილეობის მიღებას არ აპირებს. ოპოზიცია უმაღლეს საბჭოში შესვლაზეც უარს ამბობს და ხელახალი არჩევნების ჩატარებას ითხოვს.

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com