Batumelebi | ნანუკა ჟორჟოლიანს ბათუმის ყოფილი ვიცე-მერი სასამართლოში უჩივის ნანუკა ჟორჟოლიანს ბათუმის ყოფილი ვიცე-მერი სასამართლოში უჩივის – Batumelebi
RU | GE  

ნანუკა ჟორჟოლიანს ბათუმის ყოფილი ვიცე-მერი სასამართლოში უჩივის

მიზანმიმართულად ცრუ ინფორმაციის გავრცელებას, არასრულწლოვნის უფლებების დარღვევას, ცილისწამებას, პატივისა და ღირსების შემლახავი, პირადი ცხოვრების ამსახველი ინფორმაციის გავრცელებას ნანუკა ჟორჟოლიანს ბათუმის ყოფილი ვიცე-მერი ზურაბ ბერიძე ედავება. ჟურნალისტი ნანუკა ჟორჟოლიანი „ერთიანი ნაციონალური მოძრაობის“ მაჟორიტარობის კანდიდატია.

დავის საგანი 23 სექტემბრის ეთერში გასული „ნანუკას შოუა“, რომლის ერთ-ერთმა სტუმარმა, ანასტასია შატალოვამ განაცხადა, რომ მას ზურაბ ბერიძე საერთო შვილის ნახვის საშუალებას არ აძლევს. ზურაბ ბერიძე კი აცხადებს, რომ ანასტასია შატალოვასთან სამოქალაქო ქორწინებაში არასდროს ყოფილა და შვილის ნახვა დედისთვის არასდროს შეუზღუდავს.

ზურაბ ბერიძის ადვოკატებმა, რომლებმაც დღეს, 28 სექტემბერს, ბათუმში ბრიფინგი გამართეს, თქვეს, რომ არ არსებობს სასამართლოს გადაწყვეტილება ბავშვის მამისთვის მიკუთვნების თაობაზე.

„…სასამართლო გადაწყვეტილება არ არსებობს ბავშვის მამისთვის მიკუთვნების თაობაზე. შესაბამისად, ზურაბ ბერიძის მიმართ გახმოვანებული ბრალდებები, რომ თითქოს ის ზეგავლენას ახდენდა სასამართლოზე და ბათუმის საქალაქო სასამართლოს მოსამართლე უსამართლო გადაწყვეტილებებს იღებს, წარმოადგენს ცრუ ინფორმაციას… ასევე არ შეესაბამება სიმართლეს ინფორმაცია, რომ მცირეწლოვნის დედას არ აძლევდნენ შვილის ნახვის საშუალებას. დედას ბავშვის ნახვა ნებისმიერ დროს შეეძლო, როცა ამის სურვილი და დრო ჰქონდა,“ – აღნიშნავს ზურაბ ბერიძის ადვოკატი გულო დილავერიძე.

„სასამართლოს საბოლოო გადაწყვეტილება არ არსებობს, არსებითი განხილვა არ დაწყებულა, ეს ვიცით, მაგრამ არსებობს განჩინება, რომლის მიხედვითაც სასამართლომ უარი თქვა ბავშვის საცხოვრებელ ადგილად განსაზღვრულიყო დედის მისამართი,“ – ამბობს ნანუკა ჟორჟოლიანი. მან მოსამართლე როინ კახიძის მიერ 2020 წლის აგვისტოში მიღებული განჩინება გვაჩვენა „დროებით განკარგულებაზე უარის თქმის შესახებ“. ამ განჩინების მიხედვით, სასამართლომ საჭიროდ არ მიიჩნია დავის დასრულებამდე ბავშვი საცხოვრებლად დედასთან გადავიდეს.

ნანუკა ჟორჟოლიანი განმარტავს, რომ მისი ინტერესი იყო კონკრეტული ქალის პრობლემის ჩვენება, რომელიც დედაა და შვილს ვერ ნახულობს. ნანუკა ჟორჟოლიანი ამბობს, რომ გადაცემამდე მან პოზიციის დაფიქსირება შესთავაზა ზურაბ ბერიძეს, თუმცა უარი მიიღო.

„ზურაბ ბერიძემ ნანუკა ჟორჟოლიანს შესთავაზა საქმის მასალების სრულად გაცნობა და თუ კითხვები დარჩებოდა, შემდეგ მოემზადებინა სიუჟეტი… ეს არის ნანუკა ჟორჟოლიანის წინასაარჩევნო კამპანიის ნაწილი, რომ თითქოს ის უსამართლობას ებრძვის, სინამდვილეში კი გავრცელდა ცრუ ინფორმაცია,“ – აღნიშნა „ბათუმელებთან“ ზურაბ ბერიძის ინტერესების დამცველმა ადვოკატმა, გულო დილავერიძემ.

„მე ჩავწერე ორსაათიანი ინტერვიუ, მაგრამ ემოციური ნაწილი არ გაგვიშუქებია, გავაშუქეთ მხოლოდ ის, რაზეც იყო მტკიცებულებები – მოსამართლის გადაწყვეტილება და ფაქტი, რომ დედა თავის მცირეწლოვან შვილს ვერ ნახულობს… ზურაბ ბერიძემ გადაცემის ჩაწერამდე ისე ისაუბრა ამ პრობლემაზე, რომ ჩავთვალე, მორალური უფლება არ მქონდა, ეს ყველაფერი ეთერში გამეშვა… მან გადაცემაში მონაწილეობაზე საბოლოოდ უარი თქვა. თუ ის მიმართავს სასამართლოს, მე შენახული მაქვს ყველა ეს მტკიცებულება… ზურაბ ბერიძემ არათუ ჩემთან, ჩემი ოჯახის წევრებთანაც დაარეკინა ახლობლებს, რომ ეს ამბავი არ გაშუქებულიყო,“ – გვითხრა ნანუკა ჟორჟოლიანმა.

ადვოკატები არ აკონკრეტებენ, მოითხოვს თუ არა ზურაბ ბერიძე მორალური ზიანის ანაზღაურებას. იგი ნანუკა ჟორჟოლიანს „გონივრულ ვადას“ აძლევს ფაქტების უარსაყოფად და იმავე ეთერში ბოდიშის მოსახდელად.

მედიასთან განმარტებას არ აკეთებს თავად ზურაბ ბერიძე. მისი ადვოკატები კი ამბობენ, რომ მან შესაძლოა ჟურნალისტური ეთიკის ქარტიასაც მიმართოს.

„მიმართოს სასამართლოს, მე არ ვფიქრობ, რომ ბოდიში მაქვს მოსახდელი… მე ვისაუბრე დედაზე, რომელსაც შვილს არ აჩვენებენ,“ – დასძინა ნანუკა ჟორჟოლიანმა.

 

ზურაბ ბერიძის ადვოკატების ბრიფინგი

ნეტგაზეთის მასალების სხვა გამოცემებში გადაბეჭდვის წესი
ავტორი