ბათუმის რესპუბლიკურ საავადმყოფოში, სადაც ბოქსირებული პალატები და კოვიდცენტრია განთავსებული, აქვთ ხელოვნური სუნთქვის 27 აპარატი.
აჭარის ჯანდაცვის სამინისტროს ინფორმაციით, ბათუმის რესპუბლიკურ საავადმყოფოში დღეს უკვე 104 ინფიცირებულია მოთავსებული, მათგან 21 ახალი შემთხვევა ბათუმში დღეს, 8 სექტემბერს, დაფიქსირდა. ბათუმის რესპუბლიკურ საავადმყოფოში მოთავსებულ ინფიცირებულთაგან ორის მდგომარეობა შედარებით რთულია, თუმცა ხელოვნური სუნთქვის აპარატი არც ერთს არ სჭირდება.
ამ კლინიკას ერთდროულად 170 პაციენტის მიღება შეუძლია.
ბოლო 24 საათში საქართველოში კორონავირუსის 45 ახალი შემთხვევა გამოვლინდა, განიკურნა 6 პაციენტი.
საქართველოში კორონავირუსის სულ 1 729 შემთხვევაა დადასტურებული, მათგან 1321 პაციენტი გამოჯანმრთელდა, გარდაიცვალა – 19.
ამჟამად კარანტინშია 5 882 ადამიანი, ხოლო სტაციონარში მეთვალყურეობის ქვეშ – 390.