Batumelebi | ფემინისტური არტკოლექტივის „გორგონების“ გამოფენა ბათუმში [ანონსი] ფემინისტური არტკოლექტივის „გორგონების“ გამოფენა ბათუმში [ანონსი] – Batumelebi
RU | GE  

ფემინისტური არტკოლექტივის „გორგონების“ გამოფენა ბათუმში [ანონსი]

ბათუმში, 5-დან 22 სექტემბრის ჩათვლით, თანამედროვე ხელოვნების სივრცეში გაიმართება ფემინისტური არტკოლექტივის, გორგონების გამოფენა სახელწოდებით – „რეალობა, რომელშიც ვცხოვრობ“.

გამოფენაში მონაწილეობენ არტისტები: ნინო გავაშელი, სალომე ვეფხვაძე, მარიამ კაპანაძე, ანა კვიჭიძე, ქრისტინე ბებია და მაგდა ბატიაშვილი.

გამოფენა ერთგვარი ექსპერიმენტია, სადაც არტისტები სხვადასხვა თანამედროვე საშუალებით [ინსტალაცია, ფოტოგრაფია, ფერწერა, პერფორმანსი და სხვა] ეცდებიან შექმნან თავიანთი პირადი გარემო. დამთვალიერებლებს საშუალება ექნებათ, გაიზიარონ არტისტების პირადი სივრცე და გახდნენ მათი განცდებისა და შეგრძნებების უშუალო მონაწილეები.

„ჩვენ, როგორც ერთი სოციუმის წევრები, ყოველდღიურად ვირეკლავთ საზოგადოებაში მიმდინარე მოვლენებს, ვექცევით სოციალური თუ კულტურული პროცესების გავლენის ქვეშ. ჩვენ ერთ რეალობაში ვცხოვრობთ, თუმცა სხვადასხვაგვარად აღვიქვამთ მას. გარემოდან მოწოდებული ინფორმაციის შენახვა-გადამუშავება, როგორც სუბიექტური პროცესი, სხვადასხვაგვარად მიმდინარეობს ინდივიდებში. შესაბამისად, თითოეული ადამიანის მიერ აღქმული რეალობა სრულიად განსხვავებული და უნიკალურია. უნიკალურია შეგრძნებები და განცდები, რომელსაც ესა თუ ის მოვლენა იწვევს კონკრეტულ ინდივიდში”, – წერია გამოფენის ანონსში.

გამოფენა თანამედროვე ხელოვნების სივრცეში 5 სექტემბერს, საღამოს 6 საათზე გაიხსნება. დასწრება თავისუფალია.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან