წითელი შეფერილობის ხალები სხეულზე დიდი იშვიათობა ნამდვილად არ არის, თუმცა კითხვებზე – რატომ არის ის წითელი, როდის ჩნდება და საშიშია თუ არა – პასუხები არ გვაქვს. “ბათუმელებს” ამ თემაზე ექიმი ონკოლოგი მზია ხალვაში ესაუბრა.
- ქალბატონო მზია, რას წარმოადგენს წითელი ხალი?
ეს არის კაპილარული ჰემანგიომა, რომელიც წარმოადგენს სისხლძარღვოვან კეთილთვისებიან წარმონაქმნს. ჩვეულებრივ იგი ღია წითელი ფერისაა, ზოგჯერ მოლურჯო მუქი შეფერილობა დაჰკრავს. ყველაზე ხშირად გვხვდება სახის მიდამოებში. როგორც წესი, არ არის საფრთხისშემცველი, მას ახასიათებს კეთილსაიმედო მიმდინარეობა. მისი განვითარება ხდება წვრილი კაპილარული სისხლძარღვიდან. მიზეზებზე მხოლოდ ის შეგვიძლია ვთქვათ, რომ შესაძლოა ეს განვითარდეს კანქვეშა კაპილარული ქსელის დაზიანების ფონზე, შესაძლოა განვითარდეს დამოუკიდებლადაც.
იგი შესაძლოა იყოს მრავლობითი ფორმით კანზე განფენილი, შესაძლოა იყოს წერტილოვანი ფორმით, შეიძლება მთელი სხეულის პერიმეტრზეც ჰქონდეს ადამიანს… მაგრამ იმისთვის, რომ დაზუსტებით ითქვას საყურადღებოა მათი გაჩენა თუ არა, მნიშვნელოვანია კლინიკური დათვალიერება. უმეტესად, შემთხვევათა 99%-ში მას კეთილსაიმედო მიმდინარეობა აქვს, არ წარმოადგენს საფრთხეს ორგანიზმისთვის, მაგრამ მნიშვნელოვანია მისი მონიტორინგი.
- რა შემთხვევაში შეიძლება იყოს წითელი ხალი საყურადღებო?
წესით, ასეთი წარმონაქმნი სანერვიულო არ არის, ოღონდ მანამ, სანამ იგი ფორმას, ზომასა და ფერს არ იცვლის. ჩვეულებრივ იგი ღია წითელი ფერისაა, ზოგჯერ მოლურჯო მუქი შეფერილობა აქვს.
ეჭვის შემთხვევაში აუცილებელია ვიზუალური დათვალიერება ამ წარმონაქმნის, რათა შეფასდეს აქვს თუ არა მას სამომავლოდ რაიმე რისკები. თუ იგი დროთა განმავლობაში იცვლის ფორმას, ზომას, კონსისტენციას, შეფერილობას – ასეთი ტიპის ჰემანგიომა კონტროლზეა ასაყვანი.
- ვიცით, რომ, ზოგადად, ხალის დაზიანება საშიშია, ეხება თუ არა ეს წითელ ხალს?
თუ ჰემანგიომა მდებარეობს სხეულის ისეთ ადგილზე, სადაც მუდმივად შეხებაშია რაიმესთან (მაგალითად, სამკაულთან) და ტრამვირდება, გართულებების თვიდან ასაცილებლად
ექიმი ონკოლოგი მზია ხალვაში
სასურველია მისი დროული ლიკვიდაცია. ოღონდ მხოლოდ იმ შემთხვევაში, თუ ამის აუცილებლობა არსებობს.
- როგორ შეიძლება ახალი ჰემანგიომის მონიტორინგი სახლის პირობებში?
კარგია, თუ გადაიღებ ფოტოს სხვადასხვა დროს და დინამიკაში დააკვირდები – ხომ არ გაჩნდა რაიმე წანაზარდი, ხომ არ განიცადა ფორმის ცვლილება.
ზოგადად, ჰემანგიომა სხვადასხვა ფორმის, ზომისა და შეფერილობის შეიძლება იყოს, შესაძლოა ჰემანგიომა კანიდან მილიმეტრით აწეული იყოს, შესაძლოა სულაც კანქვეშ იყოს – ანუ არის ისეთი ჰემანგიომა, რომელიც ღრმად არის კანქვეშ და, ფაქტობრივად, კანის საფარველიდან იძლევა ოდნავ მუქ შეფერილობას. რთულია წინასწარ დაზუსტებით რაიმეს თქმა ამა თუ იმ ფორმისა თუ ზომის ჰემანგიომაზე.
- ეჭვის შემთვევაში როგორ უნდა მოვიქცეთ?
სიმშვიდისთვის უკეთესია ნახოს ონკოლოგმა, დათვალიერდეს დერმატოსკოპიით და შეაფასოს ნამდვილად უსაფრთხოა თუ არა. ასევე მნიშვნელოვანია მისი გაკონტროლება დინამიკაში წლების განმავლობაში. აქვე აღვნიშნავ, რომ ჩვეულებრივი ხალი ბევრად უფრო საყურადღებოა, უფრო ზუსტად – რისკისშემცველია, თუ მასში გაჩნდა რაიმე ცვლილება თუნდაც ფერის მხრივ, ასეთ დროს აუცილებელია მისი აქტიური კონტროლი დინამიკაში.
