ხულოს მუნიციპალიტეტში სოფელ ოქრუაშვილებში, სადაც 150 ოჯახი ცხოვრობს, სასმელი წყლის სისტემა ბათუმში თურქეთის საკონსულოს მხარდაჭერით გაკეთდა. ამ პროექტის ღირებულება, როგორც ბათუმში თურქეთის საკონსულოდან გვაცნობეს, 130 ათასი ლარია. გუშინ წყლის სისტემა ოქრუაშვილებში კონსულმა – მაქბულე ქოჩაკმა დაათვალიერა.
ამ სოფელში წყლის პრობლება წლობით გადაუჭრელი იყო.
საკონსულოში აცხადებენ, რომ პროექტის ფარგლებში წყლის სათავეებთან შემკრები რეზერვუარი მოეწყო, სოფლამდე მიიყვანეს წყლის 5 კილომეტრი სიგრძის მილი, სოფლის ცენტრში გაკეთდა სასმელი და სახანძრო წყლის 20-ტონიანი ბეტონის რეზერვუარი. პროექტის ბოლო ეტაპზე კი, რეზერვუარიდან სახლებამდე მიიყვანეს წყალი.
გუშინვე ხულოს სოფელ ოქრუაშვილებში წყლის რეზერვუარის და, ზოგადად, შესრულებული სამუშაოების დასათვალიერებლად მაქბულე ქოჩაკთან ერთად იმყოფებოდა თურქეთის მეჯლისის ორი დეპუტატი.
კონსულთან და თურქ დეპუტატებთან ერთად ადგილობრივი მთავრობის წარმომადგენლები მივიდნენ ქედის კულტურის ცენტრშიც. ქედის კულტურის ცენტრს ბათუმში თურქეთის საკონსულოს ინიციატივით გამოუცვალეს სახურავი, განაახლეს სცენა და მოაწყვეს გათბობა-გაგრილების სისტემა. თურქეთის საკონსულოს ინფორმაციით, პროექტზე 180 ათასი ლარი დაიხარჯა.
თურქეთის საკონსულოში აცხადებენ, რომ ორივე პროექტი თურქეთის თანამშრომლობისა და კოორდინაციის სააგენტოს ( TİKA) თბილისის საკოორდინაციო ოფისის მხარდაჭერით განახორციელეს.
