ავტომანქანები და მშენებლობები უსინათლოთა ბილიკებზე ბათუმში [ვიდეო]

ბათუმის არაერთ ქუჩაზე ველობილიკების გარდა უსინათლო ადამიანებისთვის განკუთვნილი ბილიკებიცაა, თუმცა მათზე გადაადგილება უსინათლოებისთვის ნამდვილად არ არის უსაფრთხო. ამაში სწრაფად დარწმუნდებით, თუ ერთხელ მაინც შეეცდებით ამ ბილიკს გაჰყვეთ თვალდახუჭული.

უსინათლოთა ბილიკებზე, რომლებიც გზის სავალ ნაწილზეა დაგებული, ძალიან ხშირად შეხვდებით პარკირებულ ავტომობილებსა თუ სხვადასხვა სავაჭრო და კვების ობიექტების მიერ გამოდგმულ ინვენტარს.

ასეთ ბილიკებს ზოგჯერ ორმოებთან მივყავართ, თანაც ისე, რომ ახლოს არანაირი გამაფრთხილებელი ნიშანი არ დგას მხედველობის არმქონე ადამიანისთვის. ზოგან ბილიკს მშენებლობის კედელთან მივყავართ, ქალაქის ზოგიერთ ადგილას კი უსინათლოთა ბილიკი უბრალოდ მოულოდნელად წყდება.

სამშენებლო კომპანიებს, რომლებიც სამშენებლო პროცესისთვის ითვისებენ ტროტუარის ნაწილს და მასთან ერთად უსინათლოთა ან/და ველობილიკებს, სანებართვო პირობაში არ უდევთ ვალდებულება, დააყენონ შესაბამისი გამაფრთხილებელი ნიშნები.

ბათუმის მერიის ქალაქგანვითარებისა და ურბანული პოლიტიკის სამსახურში ამბობენ, რომ ეს საკითხი დღის წესრიგში დგას. „ეს მიემართება არამარტო უსინათლოთა ბილიკებს, არამედ ველობილიკებს. ის კომპანიები, რომლებიც აპირებენ მშენებლობის პერიოდში ტროტუარის ათვისებას, სადაც შეიზღუდება, როგორც ველობილიკი, ისე უსინათლოთა ბილიკი, მშენებლობის მონაკვეთის დასაწყისის თავში და ასევე მეორე მხარეს განათავსებენ საგზაო ნიშანს ან ბანერს, სადაც მითითებული იქნება, რომ აქ შეზღუდულია გადაადგილება”, – ამბობენ მერიაში.

https://www.facebook.com/batumelebi/videos/403454577284767