Batumelebi | საპენსიო ასაკის პედაგოგების სკოლიდან გასვლის პროგრამა უნდა გაგრძელდეს – გახარია საპენსიო ასაკის პედაგოგების სკოლიდან გასვლის პროგრამა უნდა გაგრძელდეს – გახარია – Batumelebi

საპენსიო ასაკის პედაგოგების სკოლიდან გასვლის პროგრამა უნდა გაგრძელდეს – გახარია

საქართველოს პრემიერ-მინისტრმა გიორგი გახარიამ პარლამენტში წლიური ანგარიშის წარდგენისას, განათლების სფეროზე საუბრის დროს განაცხადა, რომ საპენსიო ასაკის პედაგოგების პროფესიიდან, ჯილდოს სანაცვლოდ გასვლის პროცესი, ისევ უნდა გაგრძელდეს.

„საპენსიო ასაკის 4 8426 პრაქტიკოსი მასწავლებელი ფულადი ჯილდოს სანაცვლოდ იყო ღირსეულ პენსიაზე გაგზავნილი, ეს ფულადი ჯილდო მოიცავდა ორი წლის ხელფასს და ამასთან, ჩვენ ქართველ მასწავლებლებს სიცოცხლის ბოლომდე შეუნარჩუნდათ ჯანდაცვის დაზღვევაც. ეს პროგრამა აუცილებლად უნდა გაგრძელდეს“-განაცხადა გახარიამ პარლამენტში.

მისი თქმით, ამ პროგრამას აქვს ორი მიზანი, „პენსიას მიღწეულ ადამიანებს, სწრაფად მივცეთ პენსიაზე ღირსეულად გაცილების შესაძლებლობა და სისტემა შევავსოთ ახალი, ახალგაზრდა მასწავლებლებით, რომლებმაც სწრაფად უნდა აიმაღლონ კომპეტენცია“-ამბობს გახარია.

ჯილდოს სანაცვლოდ პენსიაზე გასვლის შეთავაზება პენსიონერმა პრაქტიკოსმა პედაგოგებმა 2019 წელს მიიღეს განათლების სამინისტროსგან. მაშინ პირობა იყო, რომ თუ პედაგოგი ფულად ჯილდოს მიიღებდა, მას აუცილებლად უნდა დაეტოვებინა სკოლა.

თუმცა, სკოლას უფლება ჰქონდა, ჯილდოზე გასული პენსიონერიმასწავლებელი იმ შემთხვევაში დაეტოვებინა ხელშეკრულებით  სკოლაში, თუკი მას შესაბამის საგანში სხვა კადრი არ ჰყავდა. ამის მიუხედავად, პენსიონერი მასწავლებლის ადგილი ვაკანტურად ცხადდებოდა და ახალგაზრდა, კომპეტენტური კადრის გამოჩენის შემთხვევაში, სკოლას უფლება ჰქონდა პენსიონერი მასწავლებლის ადგილზე დაესაქმებინა.

გარდა ამისა, როგორც მაშინდელი მინისტრი მიხეილ ბატიაშვილი აცხადებდა, სამინისტროს შეთავაზება 2019 წლის ბოლომდე იყო ძალაში და იმ შემთხვევაში, თუკი პრაქტიკოსი პედაგოგები ვერ შეძლებდნენ  სტატუსის ამაღლებას, ანუ ვერ დაადუსტერებდნენ საგნობრივ კომპეტენციას იმავე წლის ზაფხულის ან შემოდგომის საგნობრივ გამოცდებზე, მათ სკოლის დატოვება მოუწევდათ.

2019 წლის ბოლოს კი, სამინისტრომ პოზიცია შეცვალა და პრაქტიკოს პედაგოგებს სისტემიდან გასვლის ვადები გაუხანგრძლივა. პრაქტიკოს პედაგოგებს სამინისტრომ 2020 წლის საგნობრივ გამოცდაზე გასვლის ვადები შემოდგომაზე გადაუწია.

ამავე თემაზე:

პრაქტიკოსი მასწავლებლების გამოცდები შემოდგომაზე ჩატარდება – ცვლილებები სქემაში

 

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com